#ParentLicenses2273

前幾日小妹同朋友去迪士尼，本身玩得好開心，但發生咗以下事件

大約晏晝四五點左右，我哋見攰攰地就搵咗個唔會阻到人嘅地方坐低準備睇花車巡遊，後面就係迪士尼啲欄杆

大約五分鐘之後，有個年約八至十歲嘅男仔行咗嚟我隔籬，佢坐喺個欄杆上面，當時小妹我冇為意。當巡遊開始嗰陣，因為身高不足，所以我企起身睇巡遊，而我臀部大約喺欄杆上面少少，個男仔就放隻手喺欄杆上面，用手背係咁摸我大脾

我以為佢唔小心就會行過少少，但係佢就特登坐近咗我（因為佢隔籬重有好多位），而隻手嘅動作冇停過。我覺得好唔舒服就俾咗個眼神警告佢

然而佢睇到之後都唔停，重用普通話同佢嘅朋友（都係年約八至十歲左右）好自豪咁講呢件事。我即刻走咗去離佢最遠嘅朋友嗰邊企

我環顧四周都唔見佢哋嘅家長，但迪士尼唔係要十六歲或以上先可以自己入園㗎咩？既然家長帶小朋友入園玩，點解唔好好看住你哋嘅小朋友？而且灌輸咗小朋友錯誤嘅價值觀——非禮他人係一件值得驕傲嘅事，但呢啲完全係犯法嘅行為

最後直到巡遊完咗，小妹都係搵唔到佢哋嘅家長，咁唯有算啦

讀者投稿@某某