#ParentLicenses2263

話說今朝返工時間，我一如既往坐鐵，而車廂亦都係咁多人

未幾，有細路仔上車大聲同阿媽傾計，我都唯有塞耳機忍忍就算

經屯元天一路出去越往市區，就越多人上車，咁個細路仔就移位正正企我斜後面，佢個紙袋角吉到我，我望一望行開一步。

之後架車大力剎車，我失平衡踩到嘢，先知係個細路仔企到伸咗對腳出來，所以被我踩到

佢放聲大叫：「好痛呀！」

我都即刻Sorry Sorry，佢呀媽亦都有叫佢縮返腳唔好咁企

喺呢一刻，我原本覺得事件已經完結，點知個細路仔突然drama king上身咁，講多幾次「好痛呀！好痛呀！」，而且要睥住我，唔講以為係我突登要踩佢咁

我就話：「你使唔使咁睥我呀，我都同你sorry咗，你紙袋一嘢拮我都無出聲啦」

佢媽突然就起晒鋼：「佢細路嚟㗎！你做咩話佢呀！紙袋整到你係因為架車郁啫！」

我：「咁唔使咁睥我吖大佬，我都道咗歉」

佢媽：「佢係小朋友嚟，點解要話佢？你第時都做人呀媽㗎！會有仔女㗎！」

我：「關咩事呢？我都唔想要仔女。同埋，問題係點解佢要咁惡睥實我呢？有啲咁嘅老母真係……」

佢媽：「佢出街緊係會望人㗎啦！咁我希望你一世都唔好有仔女呀！」

佢一路鬧，一路落咗車

讀者投稿@日日逼西鐵的社畜