#ParentLicenses0181

話說幾年前過年嘅，有親戚一家大細嚟我屋企拜年，發生咗一件令我失去人與人之間嘅信任嘅事。

我一向都有儲開模型同埋精品喺自己房裏面嘅書櫃入面（透明嗰啲玻璃櫃），我事先已經約法三章同佢講：「櫃裏便擺咗一啲姐姐好重要嘅公仔，所以我唔希望會唔見同埋會整壞，如果你想玩玩具我呢度有玩具比你玩」，當時佢媽媽都在場一齊見證住我哋勾勾手指尾。

之後發覺飲品唔夠，咁我落街幫手買，因為我個櫃好高正常一個六歲小朋友自己唔夠高攞，咁我都放心落街買，但估唔到返上嚟嘅時候悲劇發生。

擺喺櫃裏面嘅模型全部拎晒出嚟係地下爛晒，頭都甩埋，個迪士尼公主puzzle唔見咗幾塊，總之全部都要報廢。我嗰下好嬲差啲喊出嚟，我同佢講：「你唔係應承咗我㗎咩，點解嘅？而家你違反信任。」佢阿媽行過嚟解釋同我講話佢個仔淨係想睇，所以我拎出嚟俾佢睇，一句對唔住都冇好似冇事發生過，我嬲到即刻返入房鎖門。好地地一個新年搞成咁。

其實我冇嬲細個小朋友，細路仔冇乜自控能力真係唔出奇，其實冇自控能力都係佢阿媽教出嚟。個細路仔一句話想玩，個大人完全唔理違反咗承諾，滿足自己個仔嘅慾望係自私。咁樣寵小朋友係教個小朋友講大話違反誠信，灌輸一啲錯誤嘅價值觀俾佢。

最後忠告一句，比人話樣衰都係咁話，大家過年嘅時候，重要嘅物品真係要收埋鎖起佢。

讀者投稿@Cindy