#ParentLicenses2234

到自己有了小朋友，諗返起以前細個做嘅事，先發現原來唔係我問題

喺我讀小學嗰陣，媽咪朋友個仔嗰時一歲左右，識行但未識講嘢。相信如果有湊過BB都知，唔識講嘢表達嘅BB係會用喊同叫去表達自己需要

咁當時嘅我同佢玩，因為玩得太開心，BB笑住係咁尖叫，而佢阿媽因此而走嚟兇我

他媽：「你咁樣會搞到xx喉嚨痛㗎，到時佢真係病咗，我要你賠返醫藥費！」

自此嗰次之後，我好驚佢哋，唔敢再同佢個仔玩

去到我差唔多升中，佢個仔讀小學，佢阿媽有事拜托我媽幫手湊三日

喺嗰三日，我媽湊個細路曳事連連，例如喺放學時，佢一路行一路吐口水；去到巴士站等車，佢係咁爬啲欄杆，我媽叫佢都唔識停；上到嚟我屋企，係咁踢我屋企個垃圾桶，又不問自取我部遊戲機嚟玩等等

我媽最尾嗰日交人，佢講返嗰三日發生咩事俾返佢朋友聽，佢朋友就唔當係咩一回事

他媽：「小朋友係咁㗎啦，係活潑啲，鍾意周圍走㗎啦；佢想打機咪借俾佢打囉，乜你個女咁小器㗎！」

後來就知道點解佢個仔會隨地吐口水，原因係兩公婆要返工，就交個小朋友俾爺爺湊，而爺爺帶個孫落街就成日隨地吐痰，個孫就有樣學樣

直到最後，我媽嬲咗佢，直頭係改埋電話號碼，斷絕來往

圖片來源@國產凌凌漆
讀者投稿@小朋友係咁架啦呵呵