#ParentLicenses2164

事情發生於一間位於土瓜灣嘅中醫診所，有一位媽媽帶同工人和兩位小朋友去睇醫生。我到達嘅時候只有一位小朋友同工人姐姐在梳化等候，而其他人正在應診

開頭小朋友好多動靜，間唔中都有鳩叫，但我見情況唔嚴重就選擇忍耐一下，始終工人姐姐個立場係好難阻止個細路，但係當媽媽出咗嚟之後，藉由兩個細路相遇，吵鬧就開始喇

心諗佢哋開始失控，其中有個細路重無啦啦衝返入診症室，媽媽亦無採取任何行動去阻止，不過好彩嘅係我聽到佢哋話準備離開，遲吓先返轉頭拎藥，所以我就諗住：算啦，佢哋都走啦，無謂呢個時間同佢嘈啦

點知我入去應診同埋拔罐嘅時候，聽到出面好嘈，媽媽同兩個細路玩得好開心。嗰下我心情好激動，但係無奈又郁唔到，出到去佢哋又走咗，所以惟有透過呢個page話返俾呢位家長知道，其實你哋咁樣係好影響到人，特別呢度係診所嚟

另外，佢哋俾人個感覺重要係有啲富貴，有工人，兩個細路仔講英文，屋企嘅教育程度理應唔錯，但係居然唔識公共秩序，睇嚟生仔真係要考牌

順帶一提，其實每次發生咁嘅事，小朋友係最無辜，因為家長係有責任去指導佢，如果搞到佢俾人鬧就無謂啦

最後，大家都係成年人，講返件事出嚟唔係為針對邊一個，只係想透過分享例子做下事件分析，同時亦希望呢位家長睇到的話下次可以作出改善，謝謝

圖片來源@唔識教唔好生
讀者投稿@唔識教唔好生