#ParentLicenses2163

曾經識得一位媽媽朋友係超級大嘥鬼，有時同佢出街食嘢真係好想扔佢去非洲

有一次同佢行街，我哋路過一間珍珠奶茶店，大家買杯嚟試下，點知佢飲咗幾啖就車咗杯嘢落垃圾桶

我問：「係咪杯嘢變味壞咗，使唔使返去換過杯？」

佢話：「我覺得杯嘢冇特色，唔太啱飲，所以揼咗佢算」

我同佢都係買同一款，我自己覺得又唔係太甜太淡，不過冇特別係真嘅，但使唔使飲嗰幾啖就揼落垃圾桶呀？

又有一次我同我仔，加埋佢兩母女去日式餐廳食飯，佢嗌咗個烏冬，又係食幾啖就擺埋一邊

我問佢：「啲烏冬咩事？」

佢話：「啲烏冬係稻庭烏冬，唔係我食開嗁讚岐烏冬，覺得口感唔太啱」

反觀佢個女就好生性話：「陳老師教我哋唔可以浪費食物，話呢個世界唔係個個好似我哋咁多嘢食」

點知佢阿媽答佢：「阿女呀，唔啱食何必逼自己食晒佢呢？食嘢係享受唔係受苦呀，你食啲唔鐘意食嘅嘢你享唔享受？咁不如倒咗佢重好」

然後佢個女冇聲出

我都有同朋友講呢兩件事想佢哋分析下，但估唔到有一半都支持嗰位媽媽嘅講法，認同食嘢唔應該受住苦咁食

其實杯嘢飲唔係壞咗，只係純粹冇特別，都未至於飲幾啖就車落垃圾桶呀？啲烏冬唔啱口感，都未至於食幾條就等人收呀？

由細到大，我媽都係教導我要珍惜食物，即使佢煮嘢唔好食，我都唔想浪費佢嘅心機

讀者投稿@m