#ParentLicenses2143

平日放學時間，我小朋友要去補習，有時喺此時間空檔，我都會去圖書館睇下書，順便去兒童圖書館睇有無書啱小朋友睇，順道借埋俾佢

北葵圖書館有兩層，成人在二樓，兒童嘅在三樓。是次我一到埗就去兒童圖書館，就已經聽到有啲女仔聲好嘈

當時有幾個小二三左右嘅女仔坐在圖書館內俾小朋友除鞋上去嘅閱圖角，佢哋忘我咁又笑又講下嘢，已經吸引咗好幾個家長睥住

未幾，我行過佢哋身邊，始發現原來佢哋玩緊錄影定直播，同時玩緊鬼口水，重係即場加水去製作

我心諗：「你無嘢嘛？在圖書館玩WORKSHOP，想做埋YOUTUBER？」

無耐有職員行來叫佢哋靜啲，而且同佢哋講：「唔可以玩呢啲嘢喎！要收埋！」

職員走開後，佢哋又再錄影過，又再拎啲鬼口水出來！唔夠兩分鐘職員又話佢哋好嘈，要安靜！之後佢哋又收返晒啲嘢，但係唔夠半分鐘又再次故態復萌

職員第三次嚴重警告佢哋：「已經講咗三次，你哋再嘈就唔留得在圖書館」

最後班女仔終於安靜咗，而我真心為呢個職員拍晒手掌！

大佬！你哋唔安靜到，麻煩唔好入去啦好無，重要玩錄影做手作，痴孖根！

我唔知係咪家下啲人唔記得圖書館禮儀，係咪唔記得圖書館嘅用途到底係乜？

讀者投稿@CHILLI