#ParentLicenses2119

公司安排reception位置放咗兜糖，俾客等做facial時可以享有，當中有時啲客會帶埋仔女來

話說有個VIP大客，佢個仔食完又食，食咗好多粒。其實兜糖放出來俾客食，我哋都唔太理，但reception姐姐可能見佢真係食咗好多，聽聞食咗有半兜，內裡有成十幾近二十粒，所以輕輕講咗句：「小朋友唔可以拎咁多㗎」

當時我聽住佢講，佢語氣真係好輕，不過個客仍即時大發脾氣話：「食你幾粒糖都唔得呀？」

嗰一刻所有reception附近嘅人都嚇到唔敢郁，同時負責跟佢嘅同事即時衝出來道歉。但個客仍然好嬲，facial都無做就走咗

之後經理打電話俾個客去道歉，搞咗好耐先令個客消氣。個客再來時，同事又送花又道歉，然而個客重叫司機搬咗幾箱糖送上來，大放厥詞：「大把糖俾你哋」

唔知大家有無呢啲經驗，放啲糖唔係唔食得，只係有啲職員見小朋友拎太多係會出聲，其實小朋友食太多糖都唔好啦。我知reception姐姐可能有更好嘅處理方法去制止小朋友再拎，但佢都只係輕輕講咗句而已，個阿媽使唔使咁大反應呢？

今次事件就係小朋友狂食人哋啲糖，被勸阻阿媽就發脾氣鬧人；下次就可能小朋友第時去到第二度，有咩事被勸阻，就會叫老母出來做擋箭牌，就算嗰件真係錯事，極端啲就例如「我要打劫！你阻止我？阿媽！」「打劫你少少錢都唔得呀？」

都係極端例子啫

讀者投稿@小薯一名