#ParentLicenses2113

尋日同朋友一家去咗科學館，三樓兒童天地有個「小小工程師」體驗遊戲，裏面有條路軌，可以放啲假磚頭上架車仔度，推住架車仔周圍行

玩玩下期間，有個小朋友特別興奮投入，佢會同我仔或者其他人士講：「你唔好行呢邊，我要轉彎」「重唔開閘，我要過」

其實都冇理會佢，直到玩玩下，我個仔喺前面，而佢喺後面突然推住車加速，始見危險

我朋友已經即刻開聲話：「唔好太快呀小朋友，會撞到前面嘅人」

個小朋友依然一啲都冇理，keep住加速跑，最終架車仔撞到我仔嘅後腳，個小朋友重好開心想嚟多下

我即刻同朋友一人一邊捉住佢個車仔，我好大聲咁話：「小朋友你夠啦，唔好咁快呀，你撞到前面嘅人啦！」

其實我當下都幾大聲，但個細路一啲都唔驚，就算已經捉住佢架車都重想嚟多下，用盡力向前推

我忍唔住喝多聲：「小朋友你屋企人呢？已經撞到人呀，你好停啦！」

現場連工作人員都過嚟叫佢停止，我同時還顧四周都搵似佢家長嘅人，見其他大人都陪住小朋友玩，只係有個肥佬企喺附近

個小朋友睇落得四五歲左右，科學館又唔係樓下公園，個小朋友冇家長陪伴嘅咩？啲細路係完全唔驚你大人㗎喎，你話佢都唔識驚

我為咗避免佢再撞到我仔，我惟有跟住我仔後面行。一分鐘左右後我回頭，就見到個肥佬抱咗個小朋友離開。你要抱走佢當下就要抱走佢啦，開頭以為你哋唔識㗎！

我即刻好嬲、好激氣，原來佢（屋企人）就企喺隔離完全目睹整件事情嘅發生，佢非但完全冇阻止過自己小朋友，而且好似食花生咁。我理解有啲小朋友係比較好動活躍，但你作為家長，係一個成年人，當你小朋友整到其他人，你只喺後面睇係咩意思呢？更甚，你小朋友係整到人之後重想嚟多次呀！

我嘅憤怒唔係嬲個細路，而係嬲個家長唔即時出嚟制止！小朋友玩得開心，因樂極忘形而發生碰撞少不免，但碰撞一次之後，係咪要阻止小朋友唔好再嚟多次呀？係咪應該要教導小朋友點做呀？

讀者投稿@激氣媽媽