#ParentLicenses2112

我小朋友返全日班K3，因為我係在職媽媽，好少返學接送，講真同班家長唔熟，喺班group亦好少講嘢，但有一件事令班group熱鬧起來

話說我小朋友近來都有埋怨「點解爸爸媽媽要返工？」「點解唔搬大屋？」「點解唔生BB？」我唔覺得詫異，只覺得小朋友好奇或聽到同學仔講佢又講都正常嘅

然而，其中有個媽媽喺班group講：「XXX媽媽，好希望你教導一下你個仔，唔好再同班同學講父母返工好Q蠢，唔接放學嘅媽咪好衰之類嘅說話。同埋小朋友唔應該講『好Q蠢』呢種說話，希望你明白咁樣會好影響每個同學仔。最後希望你提提X去完廁所洗完手先好摸我仔個頭」

X媽好快就回話：「關我乜事。我仔講乜做乜我控制唔到，你個仔受影響你都要檢討下。重有，你唔歡喜可以叫你仔痾完尿摸下我仔塊面都得」

我始察覺到原來係呢個男仔成日同大家講佢爸媽唔使返工呀、搬大屋呀、攞新玩具呀、咁慘冇媽咪接呀、你媽咪冇BB呀……

班group之後嘅對話就唔講喇

兩公婆八十後唔做嘢攞綜緩，生仔又唔教，而家又生多一件申請公屋調遷咁著數，重要不時分享下攞資助心得，佢又唔怕其他媽媽講佢，真係覺得不勞而獲係佢本事

我哋辛苦返工搵錢又唔敢生多個，儲錢交稅就係去養呢啲人，我心有時真係好唔服，真係越諗越唔平衡囉

讀者投稿@K3媽媽