#ParentLicenses2105

兒子K1時發生過一單校園欺凌，欺凌者唔係同學，而係同學個老母

記得開學無耐，突然有家長喺同班WhatsApp群組傳送咗張小朋友面仔痴咗膠布嘅相出嚟，然後打鑼咁問：「呢度有冇X（我兒子名字）嘅家長？！」佢話我個仔打傷咗佢個女

當時未見過大蛇屙尿嘅我嚇到只識當眾道歉，事後冷靜落嚟就覺得自己柒咗，於是第二朝我打咗俾老師了解情況

老師回覆只係誤會一場，實情係當日女同學上堂時不斷搲口罩，所以搲損咗面仔而已

對方媽媽當日接小朋友放學時都有追問係咪被同學襲擊，老師已解釋冇見到同學之間有碰撞。可能當時我個仔坐喺女同學隔籬，佢咁啱又噏得出我個仔個名，所以有所誤會

兒子當時只有兩歲九個月，係班上嘅細B，講嘢唔叻，無啦啦咁樣俾人點錯相，作為佢媽媽，我心裡面係十萬句粗口

我之後都有喺群組交代返老師嘅說話，但嗰位媽媽就已讀不回

我以為事情就咁過去，原來我太天真

有日，收到老師電話，佢話兒子喺班上同一位同學有爭執，咬咗對方手臂一吓

嗰刻我已經有不祥預感……冇錯，對方就係上次投訴嗰位媽媽個女

老師話自上次件事後，佢哋都有多加留意兩位小朋友，發現佢哋偶有爭玩具嘅情況，而今次係因為女同學突然搶咗兒子手上玩緊嘅玩具而引發

老師話當時佢已立即分開兩位小朋友，亦有幫被咬同學敷冰，兩位小朋友冷靜後亦有互相擁抱和道歉，學習要尊重對方身體

老師繼而補充，小朋友喺呢個年紀有爭執實屬正常，對佢哋嚟講係學習嘅過程，老師一般唔會刻意放大事件或懲罰任何一方，以免有小朋友被標籤為bully/bitter

可是事情又點會咁簡單？對方媽媽一早已喺群組玩公審，大肆標籤咗我仔係問題兒童

同日，女同學媽媽主動打俾我，我立即為兒子咬人一事道歉，而對方嘅反應係：「嘿，你都知係你個仔錯」

佢認為校方處理失當，唔公開我兒子名字係包庇緊施虐者助紂為虐，佢話佢女兒被咬，係受害者，但卻被老師反屈係搶人玩具唔啱嗰個，所以佢要求我第二日同佢一齊返學校搵校長對質還佢女兒公道，唔係就會告到教育局

我以已交俾學校處理為由拒絕咗

及後，佢三日唔埋就會喺群組傳送自己小朋友手瘀腳瘀嘅相出嚟，仲有一啲SEN相關嘅資訊，甚至佢試過不下數次打電話俾我，問我帶咗兒子做評估未，佢話幫我問過專業人士，覺得我仔咬人行為係亞氏保加或自閉症譜系，勸我早日考慮轉個仔去特殊學校

電話講完，又喺群組再講

我有諮詢過註校社工同老師，但佢哋話我小朋友年紀太細，一般唔會就單一事件而確定係SEN，加上老師觀察到兒子平日行為同情緒正常，都有叫我唔使太擔心

老師亦有留意到該女同學特別喜歡同我仔爭玩具，有可能係呀仔比對方生得細粒（所以易蝦啲？）

老師就呢個情況已安排調位，而兒子之後亦再冇出現咬人情況

至於關於女同學手瘀腳瘀嘅問題，老師話都有留意到女同學經常會喺班房跌親同撞親，可能係有關佢本身小肌肉發展及專注力嘅問題，就唔係屬於打架嘅傷

然而，對於嗰位媽媽整整一個月嘅疲勞轟炸，我感到身心俱疲。好記得佢有一次喺群組度問咗我一句：「點解你個仔搞成咁，你都重有心情返工？」我當堂喺公司爆喊咗出嚟

曾經，我有諗過買佢怕，不如同呀仔轉校就算，後來被老公一句：「怯，我哋同個仔就輸一世」點醒咗

第一，兒子咬人係錯，但也不至於錯到要罰佢退學

第二，兒子返學返得好開心，由開學唔識表達自己，到第二、三個月已隻經成開籠雀咁，簡單分享到喺學校玩過啲咩

第三，就疑似欺凌事件上，老師同社工處理得好好，我唔想兒子錯過一間咁有愛嘅學校

於是，我選擇相信學校，相信個仔，退出群組，再block埋嗰位媽媽嘅來電

由於個仔係搭校車返學，我好少去學校同其他媽媽交流。直到上學期完結，某日學校家長日撞到其中一位同班媽媽，聽佢講我先知原來喺我退出群組後，好快又有第二個媽媽同小朋友步我哋後塵中伏

最後，嗰位女同學媽媽用層出不窮嘅手法，終於成功投訴到校方特批佢女兒轉去上晝班

雖然我從來都唔認為上下晝班係有優劣之分，但原來呢個世界又真係有種老母，為咗爭取個女讀上晝班威啲可以去到好盡，我真係大開眼界

讀者投稿@返下晝班返得好開心