#ParentLicenses2098

先講少少背景，我父母喺我四五歲左右就離婚，我對落重有個妹，細我唔夠兩年，我哋倆都跟爸爸生活

爸爸性格暴躁，亦鍾意以暴力令人屈服，自細亦對我灌輸一大堆道德責任觀，同我講一大堆道理，例如我做緊家姐應該點點點照顧個妹，應該點點點扶持個妹，應該點點點教導個妹等等，但係佢有冇諗過，我只係大個妹唔夠兩年，我有咩本事照顧佢同教導佢？

之後嗰廿幾年發生好多事，包括中間我返咗媽媽度住，呀妹隔多兩年又嚟埋

自從個妹返咗媽媽度後，佢唔係逃學就曠課，超反叛，我同媽咪因為佢嘈大交，當中我有幾年唔同媽媽聯絡。直至我妹突然意外有咗，我媽又再搵返我，而以家就先係故事嘅開始

我妹冇同佢男朋友結婚，一直只係同居。喺頭幾年，我妹都做得算係唔錯，妹妹喺屋企做全職媽媽。妹妹都算好有心機，餵人奶都餵到好大個，亦都算肯聽我講，例如我叫佢唔好打個仔，俾方法佢去教，佢都會聽

直至我姨甥兩歲半，妹妹同佢男朋友就分咗居，當中原因我就唔深究，但作為一個單親媽媽，我知佢會好辛苦，特別係我姨甥仔有ADHD同埋嚴重濕疹。所以當佢同我傾，我都話得閒可以幫佢湊幾日小朋友。近呢兩年，每個月我重會補貼幾千蚊俾佢哋做生活開支

由我姨甥三至五歲間，我都算管教得佢好好，個妹都肯聽我講，佢亦都再有另一半，尚算和睦

然而當姨甥五歲到以家七歲，我妹就越嚟越離譜，唔單止對個仔經常呼呼喝喝，自己又懶到飛起，言教身教都不復存在，例如姨甥仔患有濕疹，我帶佢去做過敏測試，結果診斷姨甥有好多嘢唔食得，我交帶呀妹同幼稚園同保母講低食咩會過敏，點知呀妹係完全冇講

另外，呀妹姨甥兩母子之前中咗COVID，我屋企有兩個房，就叫佢哋過嚟隔離。每日早午晚三餐，蒸包蒸燒賣，三餸一湯，有菜有魚有肉，照顧尚算周到，點知我妹去到第四日，我整肉丸做下午茶俾佢哋嗰陣，我妹當住我姨甥面前同我講：「嘩～終於都有啲人食嘅嘢！」

我即刻啞咗！我經痛到飛起都煮足咁多餐，八歲我就學煮飯，雖然比唔上五星級酒店，但都不至於「唔係人食」啩！？

自此之後我就冇再理過佢哋兩母子，唔單止斷晒每月嘅補助，而且冇再幫佢湊仔

直到最近大時大節，又再見到佢哋一家三口，明顯我妹越嚟越唔理個仔。佢男朋友好聲好氣叫佢同個仔講嘢，佢就大聲喝返個男朋友：「收聲！」

而我姨甥，好明顯比以前我有管教佢嗰陣，變得冇咁禮貌，同耐性差咗，而手機更不離手！

更過份嘅都重有，早排屋企人擺壽宴，壽宴完咗之後，佢拉埋我嘅best friend去酒吧飲嘢，而個仔就扔俾一個智商有問題嘅親戚去湊。Best friend之後講返我先至知道，佢重話因為我好煩，所以唔叫埋我

面對咁嘅對待，我爸爸就仍然不停講：「家姐要睇住個妹，重要睇埋佢個仔呀」

我阿媽就話：「我理唔到咁多」

其實我身為家姐真係對得住我個妹有餘，佢嘅野我真係再理唔到咁多，但係對住我姨甥呢？我自己童年唔好，我就更想佢好，亦都好不忍一個原本可以成材嘅小朋友變成冇家教嘅小朋友，可惜若然真係要管要教，唔單止耗費心力，重可能有大把說話俾我聽，我究竟應該點做先好？

我真係唔明，如果咁冇耐性管教自己嘅小朋友，點解當初重要一時衝動生佢落嚟？難道佢唔知自己究竟有幾冇責任感㗎咩？

讀者投稿@大大大大姨媽(長文慎入)