#ParentLicenses2094

我今年二十歲，我媽十六歲嗰年就已經生咗我，親生老豆喺我出世之前已經同我媽分咗手

呢二十年嚟我從來冇見親生老豆一面，咁多年嚟都係我媽咪同公公婆婆照顧我。我出世嘅時候係七個幾月早產，媽為咗照顧我，喺我三歲之前一直都冇返過工，亦因為咁而欠落親戚一大筆錢。到我大個咗，媽佢一直返緊兩份工嚟賺錢還錢，然而我媽一直冇怨過我同嗰個男人。後嚟聽講佢識咗個有錢女，而且全家移民咗去加拿大

喺我八歲嗰年，我媽遇到我Uncle（已經改口叫阿爸），佢有一個仔，老婆已經唔喺度，冇幾耐佢哋結咗婚，之後我又多咗兩個細佬妹

呢十幾年嚟，我同我哥哥，細佬妹一直生活得好好，我阿爸對我直頭重好傾過親生嘅仔女，我功課唔識係佢教，中三揀科、揀大學都係佢同我媽幫手揀

早幾年之前嗰個男人aka我親生老豆個老婆嚟搵過我媽，話想接埋我去加拿大一家團圓。我拒絕咗，理由係我由頭到尾都冇見過呢個男人，我點解要搵返佢？

直至早幾個星期，個女人又話嗰個男人生cancer想我過去照顧佢。我用同一個理由拒絕多次，佢就直話我不孝

今次我好嬲咁同佢哋講：「由細到大佢冇照顧過我、冇理過我，我好似唔存在喺呢個世界上面咁，而家有事先嚟搵返我？我阿爸就係得一個，就係住喺我屋企嗰個」

之後個女人就冇再搵我，到底真係我不孝在先？

讀者投稿@係我不孝？