#ParentLicenses2092

我同我老公一齊咗二十年，我哋係中學相識嘅初戀，十三歲拍拖，廿三歲就結咗婚，啱啱結婚第10個年頭

關於生小朋友呢件事其實大家一路嘅共識係唔會生，至少長老就一早講明唔恨我哋生，因為佢哋都唔想幫手湊，所以都係支持我哋唔生

啱啱結婚嗰陣，好多朋友連拖都未拍過，所以身邊啲朋友都好少有小朋友。然而日子耐左，身邊啲人慢慢結晒婚，好多人重係因為有咗而結，就開始多人問我哋幾時生

二十幾歲嗰陣，啲人話：「你哋重後生，過多幾年就會想生」

到咗我三十幾歲，啲人話：「你再唔生就生唔出」

其實我到咗而家反而更加唔想生，要生一早就生咗

好多人話有仔女就好似係人生必須要做嘅事，但我睇住好多人生完之後為咗啲仔女困住晒自己，咁又真係好事咩？

自問我同先生真係冇咁嘅精神去養大一個仔女，我都好擔心我反而咁會害咗佢，既然係咁，我不如唔好生？

讀者投稿@一定要生？