#ParentLicenses1423

我有一個兩歲女，佢前一日撞親塊面，所以塊面有啲腫起、瘀黑同埋擦傷，已經睇咗醫生。今日我就帶我女去洗傷口，姑娘幫佢貼咗塊膠布喺額頭中間

喺回家嘅途中，我哋順便去買外賣。我同我女企咗喺某食店門口等，係等候期間就發生以下事情

小食店隔離係一間琴行補習中心，門口有3個小朋友企喺外面玩，目測係4至6歲左右，同時有兩個家長就喺中心入面同職員傾緊計

我女見到3個小朋友玩，佢覺得好開心就被吸引咗，慢慢行近佢哋，望住佢哋笑

然後，其中一個最細嗰小妹妹見到我女第一句就講：「嘩！好醜樣啊！」

我嗰下真係個心痛一痛，不過立刻安慰自己：「童言無忌……」

我女仲細，佢聽唔明，但依然覺得好開心，企喺度手舞足蹈

我心諗：「算啦，唔好計較……」

其他嗰兩個小朋友揸住把遮喺手，不停揮動，模擬好似耍劍咁，再用遮尖指住我個女，我女仲以為人哋係同佢玩，想行埋去

我立刻就衝過去拉返我女埋身邊，同我女講：「唔好行埋去，哥哥姐姐唔識性，會整到你㗎！」

呢個時候，嗰兩個家長就喺中心行嚟，準備帶返嗰班小朋友走
.l
小妹妹大聲同佢呀媽講：「媽媽你睇下！個妹妹好醜樣丫！」

另外個哥哥就同佢呀媽講：「我哋要打怪獸丫！」

本身我之前已經諗住算啦！而且佢哋都走啦，我忍！

殊不知，其中一個家長擰轉頭望咗我哋一眼就講：「你哋唔乖，我遲早都打到你咁㗎啦！」

嘩！嗰刻我真係爆啦！

我嗌出去：「太太！我女係跌親，唔係俾我打到咁！你點可以咁樣講㗎？」

個家長望我一眼：「我嚇我個細路咋嘛！又唔係話你，你咁緊張做咩啫！」

我話：「小朋友冇禮貌，唔識尊重人，你唔教，你教佢靠嚇？」

另一個家長就係咁拉住佢走講：「唔好拗啦」

個家長邊走邊口噏噏咁唔知噏乜，就拖住嗰堆細路走咗

個大人冇禮貌，唔識尊重人，唔怪得佢哋啲細路仔都一樣，咩都唔識！只識靠嚇！

讀者投稿@心痛嘅媽媽