#ParentLicenses2075

其實你點樣對人，你啲仔女就會學晒

我住外國，上年有家香港人新搬嚟呢條街。個媽媽好主動同我哋做朋友，咁佢叫到我哋幫得就幫

個媽媽話佢哋之前住嗰度啲香港人好衰，令到佢哋好慘，佢重話識到我哋真係好，話我哋好肯幫佢，而且贊我哋對仔女有禮貌又肯就佢個小王子。對話之中，佢透露咗佢小王子成日俾人蝦

有一日個媽媽生日，但佢喊住同我呻話佢老公返工唔理佢，乜表示都冇，又煩個仔學校嘅問題

我見佢咁慘，呢度又冇親戚朋友，我就買個蛋糕過去氹吓佢，另外我都有買嘢食俾佢個仔

然而佢小王子永遠唔講thank you，我重發現佢哋玩嘅時候，佢個仔勁霸道同野蠻，一輸就發脾氣

個媽媽見到就問我點教小朋友有同理心同有禮貌，續話移民差唔多三年，佢個仔都重係完全無朋友，不過又會話佢小王子個人好麻煩、好自私，重俾同學投訴

老實講，佢哋父母都係一樣。例如叫我買嘢冇俾返晒錢，請我哋去佢屋企食飯就叫我哋去拎外賣，但又係無夾返錢等等。本來打算做好鄰居唔好計較，但佢哋似搵笨多

另外，當佢得知我同老公仔女都係喺呢邊出世，佢哋就話佢哋係英藉二代，唔似啲BN(O) visa holder咁cheap，甚至連佢個仔都係咁講嘢

剛剛學校放長假，佢哋想佢小王子每日嚟我哋度食午餐晚飯，更叫我大女免費同佢練琴，再得寸進尺問可唔可以到瞓覺時間至返屋企。我話我哋都要去旅行，個老母就嬲咗我哋

個媽媽而家唔睬我哋嘅，而且重同咗佢之前話好cheap、好窮、拎BN(O) visa嘅人玩

圖片來源@武狀元蘇乞兒
讀者投稿@煩到我想搬