#ParentLicenses1995

是咁的，我舅父差唔多60歲，佢幾年前至結婚，舅母而家40頭

而我婆婆就90幾歲，生咗5個女1個仔。相信大家睇啲仔女嘅數量同性別，就知咩事

可能舅父都覺得，如果生仔嘅話，等到個仔大學畢業，佢自己都已經70幾歲，所以就算佢係我婆婆唯一嘅仔，佢一開始已同佢老婆有共識唔生細路

然而，我婆婆就當然唔係咁諗

我婆婆好想抱孫，勸唔掂舅父，就走去同我阿媽同其他姨媽、阿姨呻，叫佢哋幫下口叫舅父舅母快啲「做人」，但效果甚微

最初啲姨媽、阿姨都會問吓舅父舅母「你哋唔鍾意小朋友咩」之類，不過佢哋見人哋兩公婆都有難處，所以都冇再勸，反而係鬧婆婆：「你係時候要改變吓呢啲咁落後嘅思想喇」

婆婆見叫唔郁啲女，婆婆就向我哋孫輩埋手

有次我去探婆婆（嗰日舅父都喺佢屋企），無端端婆婆喺度同我講：「啲人結咗婚又唔生仔，唔知有咩用！？」

好明顯呢句嘢係講俾舅父聽！

我一時都唔知有咩反應，咁啱電視喺度播安倍晉三嘅生平（安倍俾人暗殺?），我就指咗指電視：「點可以話結咗婚冇生仔就冇用？你睇吓安倍，佢都冇小朋友，但佢做過首相喎！」

不過我婆婆連人哋係前首相都唔知

又有一次，佢見完表妹個未婚夫，聽到人哋打算一結婚就生仔，又講埋啲咩：「你睇吓表妹幾識諗，邊似得某啲人」

我就叫婆婆：「唔好理人啦，每對夫婦都有唔同嘅生活」

喺嗰日之後，我阿媽好認真同我講，其實佢好擔心我一個人去探婆婆，因為我唔識應對呢啲對話，又唔忍心鬧婆婆老套，搞到佢會認為我冇鬧返佢轉頭，就係支持佢持續對舅父舅母催生呢個舉動，所以著我冇咩事就唔好去探佢啦，有咩電話講咪算囉，唔好玩轉個party

不過我又覺得冇理由要因為呢個原因唔去探婆婆囉?

雖然婆婆唔係獨居啫，但我哋去睇佢都好應該吖，只係我唔係好識應對呢啲話題啫

我都明白，因為我自己都同舅父一樣，唔想考呢個「牌」！既然知道自己handle唔到考咗牌、考梗牌嘅日子，唔去考都好合理啫……

讀者投稿@唔想考牌冇錯