#ParentLicenses1987

長文慎入

我從小生長在一個看似普通，實際上充滿言語暴力的和教育混亂的家庭中。所有事嘅序幕係源於我阿媽一個「有趣回憶」

阿媽話：「想當年根本無諗住有你，嗰時去咗醫院做流產，做到一半遇到朋友嚟阻止，最後先至生咗你嚟，諗起都覺得搞笑」

呢件事佢覺得搞笑，但我同我家姐都唔覺得好笑。我認為拋棄自己個女，竟然重可以攞嚟講笑？！但我家姐則認為，所有資源係因為我嘅出世先至無咗

細個無論有咩事，例如去廁所、想買文具、肚餓……總之只要我出聲同提出要求，我阿媽都係話：「乜你咁麻煩㗎！」

然而，我阿媽對我家姐絕對有求必應，而且重話佢生性，從來唔會扭計買玩具

當然啦，因為佢要嘅嘢可以喺我身上搶走

有時做錯咗啲嘢，阿媽首先會劈頭第一句鬧咗我先，然後會同人傾電話，講俾其他人聽我點樣唔好，甚至會幾年、幾個月後都要攞出嚟講

細個嗰時，我有一日被人非禮摸胸，我好唔開心咁返屋企話俾阿媽知。阿媽俾咗個我永世難忘嘅回答我：「俾人摸下唔使死㗎」

喺呢個家從來唔會出現「商量」兩個字，我唔會有得選擇，但即使俾佢話事，佢都會基於啲好荒謬嘅原因嚟做決定

小學時期，我嘅成績足夠入區內band 1，佢因為交通方便迫我選咗間一落車就到校門嘅band 3學校

我試過出聲，但佢一句：「我鍾意你讀邊間就邊間！」

我因為呢件事喊咗好耐，然後佢竟然同啲親戚朋友講話覺得我喊得好搞笑

另外。因為佢唔敢惹我家姐，所以經常將喺家姐身上受咗嘅氣都發洩喺我身上，而我呢位家姐亦完美咁繼承咗佢毒舌同夾硬嚟嘅基因

家姐同我喺同一間中學度讀書，由我踏入呢間中學開始，就係我人生最黑暗嘅時間

家姐會做阿媽線眼，不停監視我，迫我連學會都要同佢喺同一個。我俾人罰企，佢會搵成班同學一齊嚟笑我；每日返屋企講我壞話，但上台攞獎嗰啲，佢隻字不提

我受家姐氣，返到屋企話俾阿媽知，阿媽每次都會話我講大話，反形容我哋兩個咁樣叫做「相親相愛」

家姐重會扮到自己好識諗，好識人情世故，但得我同佢嘅時候就會無啦啦發癲搵嘢扔我，講粗口鬧我

我阿媽亦會不停要求我做啲佢自己都做唔到嘅事，例如唔好同人比較，但佢經常同人比較；佢話唔好開口數人不是，但佢每日都做緊，用詞亦好毒。我敢講佢出口嘅毒舌程度，係可以搞到一個鄰居、陌生人即場崩潰或者睇唔開（試過好多次）

我阿媽重有一個習慣，佢睇到好多青少年犯罪、濫藥、未婚懷孕之類嘅新聞都會覺得有我份，經常俾說話我聽

最大劑係，我阿媽「認為」係嘅嘢，就會走出去話俾親朋好友知，所以所有親戚對我都好有成見

終於有一日我睇唔開，我喺學校自殺，俾人送咗去醫院。我阿媽第一時間係打俾所有親戚朋友話俾佢哋知，我搞到佢樣點唔開心

嚟到醫院，我阿媽第一句係話：「真係俾你激死，我原本今日有嘢做，你就搞埋啲咁嘅嘢，仲要嘥時間接你出院！」

之後其中有個親戚問：「會唔會係佢有咩唔開心遭遇？」

我阿媽代我答：「無可能㗎，佢平時日日都好開心！」

我聽完好失望，想開口回答，但俾佢制止咗。更失望係親戚走後，佢認為係我累到佢俾人話，俾人睇唔起

直到啱啱中學畢業，佢要求我儘快搵男朋友然後結婚。過咗幾年我真係搵俾佢睇

媽：「如果你應承我今世都唔結婚，我送層樓俾你！」

我：「明明係你迫我搵人嫁」

佢又突然慈母上身：「點捨得自己個女嫁人，自己肯定無咁講過」

但過幾日，佢又再提結婚問題。佢會不停俾說話我男朋友聽，搞到我嗰時個男朋友只係見過佢一次就話：「以後唔係好想再見到佢」

通常我阿媽講完、唱完、做完所有嘢，就會扮失憶，堅持自己無咁做過，話佢自己係一個慈祥嘅阿媽，仔女做乜都會支持。然後我質問多幾句，佢會話我屈佢，然後又打電話同班親朋好友講話我點對佢唔好

卒之有一次，我知佢又要俾說話我聽，我攞咗部電話出嚟錄音，然後俾返佢聽，佢都重堅持錄音裡面嗰個人唔係佢。但後來又招認，重話覺得自己無問題：「你係我個女，我鐘意點就點」

喺呢個時間，我開始同佢關係由本來就唔算好轉為極差，一次又一次嘅失望，我唔會再好似以前咁當無事

後來我結咗婚，佢竟然將我嘅變化怪罪落我老公身上，認為係我老公搞到我唔再理佢

有次佢突然喺我屋企門口出現坐喺度等，我嗰時返緊工，佢堅持要坐到我出現為止。最後我放工俾咗佢入屋，佢一入屋就指手劃腳，話我住嘅地方點樣唔得體、點樣失禮，話我老公無用

嗰時我嬲到叫咗佢走，講到明如果佢再出現，我會搬去佢永遠搵唔到我嘅地方

而當然，佢又再周圍話俾人知

長期嘅言語暴力同騷擾，令我有一段時間要睇醫生開鎮靜劑同安眠藥。而且喺每次家庭聚會前都要食藥先可以去

直到而家，過咗咁多年，我阿媽佢仍然無改變過

有啲親戚叫我試下原諒佢，可能佢都有好多委屈。我唔係無試過，但佢嘅攻擊係到而家都一直進行緊，點樣原諒？

其實我只有一個要求，唔好理我得唔得？

讀者投稿@世離