#ParentLicenses1409

一個風和日麗嘅中午，好多人都係XX站轉車搭輕鐵

千辛萬苦下，我終於迫到上架輕鐵，發現有粒豆丁企咗喺門前，目測3-4歲，但唔見佢呀娘喺隔離

粒豆丁算好乖，只係佢無時刻緊握扶手，握下又搲下頭，握下又搲下頭

我戥個細路危險呀，輕鐵一轉個靚彎，個細路真係仆咗落地或者撞埋對門，有咩受傷就唔好啦

未幾，終於見到豆丁嘅呀娘，原來佢喺人群入面聲控個細路「小心啲」就算，之後自己繼續轆電話

我：「?」

下個站勁多人落車，個細路仲係企喺門邊，啲大人喺佢身邊左穿右插，一個唔小心真係撞咗個細路出門，到時就唔知係手/腳/頭卡住咗月台空隙。連係外人嘅我都預想到有危險可能會發生，但佢呀娘都冇諗住拖或者拉返個細路埋身邊

有位上咗年紀嘅auntie見到就拉個細路去一邊，好聲好氣咁講：「小朋友你行埋一邊先」

豆丁即刻走去佢娘身邊，我以為個豆丁驚死，所以返去佢呀娘度，點知原來係為咗拎返架車仔，又行返去門邊無定時咁「緊握扶手」

企喺細路附近嘅人都互望，睇下有冇人認領個細路。唯獨知豆丁呀娘係邊個嘅我留意到，佢呀娘仲係企咗喺車箱入面，聲控都廢事，直頭冇眼睇添

我：「?」

又到下一個站，個豆丁又穿插喺人群之中搵佢呀娘，當時我已經落車，唔知個豆丁係咪又拎多架車再穿梭人群中，再返去門前度企呢？

讀者投稿@A