#ParentLicenses1967

今日去希慎，喺殘廁門口遇到位好急嘅傷殘人士，但唔知係殘廁智能鎖太智能定壞鬼咗，道門關到但鎖唔到，又一直顯示「空閒中」，只要有人一揮手就又開返門，所有人哋就拜託我幫下手睇住

未幾，我企企下突然有隻手伸過嚟，重想揮手掃開門。佢哋係一家四口，兩大兩小，兩男兩女

我立即話：「入面有人」

個好大隻嘅阿爸立即兇我，完全唔理我，再伸手一掃，堅持話：「小朋友急，嗰度寫住冇人」

然後尷尬到呢，人哋只係「去」咗一半時，道門就開咗

然而，個大隻阿爸完全覺得自己冇錯，我只係講咗一句，佢就超大聲咁鬧我

我：「我都話咗入面有人，唉」

大隻佬（超大聲）：「所以我而家咪企喺度囉！我點知入面有人呀！小朋友急呀！你而家講咩呀？你想點呀！？我點知你呀！係寫住冇人！小朋友要去呀！」

我：「小朋友急，你哋可以帶去廁所，根本冇人排隊！同咗你講入面有人，你重特登開人哋道門，人哋有幾尷尬你又知唔知？」

然後，當時人開門出嚟，我同當時人講聲唔好意思，我睇遲眼，就走咗。阿媽就帶個女入去（當然都鎖唔到），阿爸全程兇神惡煞

最後，都係各自帶去男女廁，歷程差唔到6, 7分鐘，原來小朋友都忍到嘅，勁呀！

讀者投稿@路人甲