#ParentLicenses1962

我一拖二（7歲、5歲）去由康文署所管理嘅公園玩，遇到真心痴線佬（「丁蟹」思維型人士），令我反思一直教仔女唔可以出手打人，其實係咪害咗佢哋

我坐喺兒童遊樂場旁邊嘅長椅（因為大肚，真係好攰，開頭有同佢哋玩咗一陣），我突然聽到一把好兇惡嘅男人聲大鬧：「細路，你咪行呀！」

當時我都唔知係鬧緊我個仔，但因為把聲係好惡又充滿怒氣，所以我即刻抬頭望下咩事

我見到有個男人（35歲左右）追住我個仔鬧，係「哄」個頭埋去我個仔面前，貼住佢塊面咁濟咁鬧佢

我即時起身行埋去，我一邊行，就見到個痴線佬一手捉實我個仔嘅膊頭，再用力向後拉，我個仔半邊身向後打斜跌

我嗰刻驚到癲咗，大叫：「你放手，唔好郁手郁腳！」

我攬住個仔後，好大聲問佢：「你做咩打我個仔？」

痴線佬好惡咁答：「我同佢講嘢，佢唔應我，我想捉住佢啫」

我再講：「發生咩事都好，你出手就係唔啱」

痴線佬輕挑地答：「我好細力拍下佢，你咁都覺得係打呀？」

我不斷強調：「我親眼見到你打佢呀！」

個痴線佬知無得抵賴，就喺度大鬧我個仔：「你做咩企喺我個女架滑板車前面？我個女踩得好快，你做咩喺前面撞佢？」

我真係黑人問號，你個女（都有7, 8歲，同我個仔差唔多高）喺唔可以踩滑板車嘅地方踩滑板車，重要踩得好快，然後話佢前面嘅細路撞佢？

其實嗰刻我都未覺得佢係「丁蟹」， 但之後聽埋佢講嘅嘢，係會覺得同佢講嘢係浪費自己時間

當刻我個仔驚到震晒，又眼濕濕，我抱住佢安慰，慢慢氹佢講，叫佢：「唔駛驚，媽咪喺度保護你，你照事實講，點解企喺佢部滑板車前面？」

我個仔口震震咁講：「佢打妹妹」

我聽到嗰刻係由驚慌變為憤怒（其實我一直都係好驚，所以我特登講嘢好大聲，吸引其他人望過來）

個痴線佬又發癲大叫：「邊個係你個妹？！」

佢趁我護住個女，又走去「哄」埋我仔度兇佢：「你親眼見到呀？！」

我仔口震震答：「唔係好見到，妹妹講……但我見到佢喺繩網，用泡泡槍射妹妹」

個痴線佬可能都有啲心虛，態度開始好咗，無再兇我哋三母子。但佢就開始發表自己啲偉論，話：「我嗰女玩泡泡槍，係你哋黐埋黎嚟，實會射到㗎」

嗰度唔係平地喎，係垂直嘅繩網，要一直向上爬，再瀡滑梯落返嚟。佢嗰女可以一手爬繩網，一手用泡泡槍射人都係犀利嘅，應該接受過長期訓練同練習。只係個痴線佬覺得係我哋黐佢啲泡泡玩，應份要俾佢個女當標靶咁射

佢講到我出聲：「係你有問題，接受唔到有碰撞，唔好落公園玩」

我俾佢啲歪理激到癲咗，小朋友之間有碰撞我接受到。我係接受唔到有成年人追住個細路嚟鬧，重要出手捉住個細路，作勢打佢

事實上，我個女之前已經同我講咗一次，話有人用泡泡槍射佢。我重同個囡講：「人哋應該唔係故意，可能想同你玩啫」

我真係估唔到一個7, 8歲嘅女孩子竟然會用泡泡槍追住人嚟射，追到上繩網

我好大聲質問個痴線佬：「咁你做咩出手打我個仔？」

個痴線佬開頭唔出聲，我就一直重覆大聲鬧佢：「你出手打細路就唔啱！」

佢唔理我，走去問佢個女。不過佢問極都問唔到嘢，因為我個仔由始至終都係無出過手，亦無出過口，無鬧過佢個女一句

之後我要佢同我個仔道歉，因為我一直都教細路，任何情況下出手打人係唔啱，佢哋唔可以出手打人；同樣地，其他人都唔可以出手打佢哋，所以我係好堅持要個痴線佬道歉

痴線佬係好敷衍咁講咗句嘢，我唔太記得，但一定唔係正式道歉。但我都即刻教個仔，因為個男人出手打你，係佢唔啱，所以佢要道歉。如果你有出手打人就係你唔啱

但係估唔到個痴線佬之後爆金句：「係呀，成個公園啲人都打你個仔呀，你唔好落公園玩啦」

我即刻回佢：「唔係成個公園呀，係你兩父女打人咋」

我兩個細路應該因為驚，同我講好熱，想返屋企。我哋一邊走，個痴線佬一邊大叫：「落公園玩，預咗……啦 （聽唔清楚），你以後唔好落公園玩呀！」

其實接受唔到落公園玩有碰撞嘅係唔係痴線佬佢自己？佢個女踩滑板車踩得好快，其他小朋友唔可以阻住佢，因為佢擔心佢個女避開時會跌倒，但佢會調轉嚟講，話：「我個女踩得好快，你個仔阻住佢， ……（口疾疾），整到你個寶貝仔就重唔好啦」

其實你心嗰句係「你會整親我個女」，根本你個心係覺得我個仔會整跌你個女。如果你係擔心你個女會撞到人，應該叫停自己個女，而唔係追住我個仔嚟鬧同捉住佢啦！

講真我落公園玩，點解要預咗唔踩得滑板車嘅地方有人踩得好快，重要有痴線佬追住嚟鬧；唔企定俾佢鬧，就要俾佢捉住嚟鬧同作勢要打人？！

我承認喺成個過程，我係好嬲、好激動、好大聲，一來見到個仔俾人捉住咗，個心好驚；二來我係特登大聲講嘢，吸引其他人注意，令對方唔敢再出手

歡迎當事人或者其他現場見證人士補充及更正，如果當事人唔同意事件經過，或者唔承認有出手捉住我個仔，歡迎聯絡我，一齊去報警

讀者投稿@遇上丁蟹的驚慌媽媽