#ParentLicenses1960

見 #ParentLicenses1959 問大家如何處理小朋友遊玩時與其他人的相處情況，我亦有一事想請教各位??

【延伸閱讀：#ParentLicenses1959 https://parentlicenses.hk/?p=3231】

我自問重視家教，自女兒（現已兩歲）還小的時候都教佢去公園或遊戲室時一定要排隊；當見到有BB在場，就要小心謹慎

因女兒屬高敏，如果有小朋友在旁衝撞，佢就會好驚，所以每次去玩我都跟實。如果見到有哥哥姊姊同時想玩同一樣嘢，我會叫佢讓人，費事阻到人。然而如果佢行緊，但有人嘗試衝撞打尖，我就會阻止

我知道女兒放膽在外面盡情遊玩，係因為知道媽媽會保護佢，我希望「你唔使怕，媽媽喺度」唔止係一句安慰嘅說話、一句口號，而係對佢嘅承諾

雖然初心係咁諗，但我亦常常質疑我係咪過度保護女兒

早前帶佢去遊戲室玩，其中有一個窄身、供小朋友攀爬的繩網（見圖）。我認為呢個繩網應該只預俾一個小朋友通過，我亦只在無咩人玩緊嘅時候，先同小朋友爬上去

然而，問題來了

女兒慢慢行上去，中間完全無停頓，卻多次有大年紀嘅小朋友想快速喺旁邊衝上去。雖然我都有伸手阻止，要求佢哋排隊，但就被回以：「咁係咪要全部人都塞住喺度？」

當然佢嘅講法有誇大成份，因為只有佢一個喺後面等，並冇所謂嘅「所有人」；而我女兒已經爬咗一半以上，10秒內一定抵達終點。但想問其他家長，你哋認為我有做錯嗎？你哋又會點處理？

感激賜教，謝謝

文章來源：讀者投稿@疑惑的媽媽