#ParentLicenses1947

「一樣米養百樣人」呢句說話相信大家一啲都唔陌生，今日就想同各位新手父母同未有經驗嘅父母分享我好朋友剛剛嘅親身經歷

大家希望孩子長大後成為一個點嘅人？做一個負責任、勇於承擔、守規矩、有品德教養嘅人？定係一個會前言不對後語、講大話、推卸責任嘅人？呢一段文字最教人反思嘅唔係小朋友做錯事嘅過程，反而係父母嘅處事方法

位於隔離屋苑嘅朋友第一時間同我講完後，我就想分享俾大家，因為我哋都終於明白點解有啲父母對自己小朋友打人或者傷害人都可以冷眼旁觀同大條道理

喺香港，法律上設定咗10歲以下嘅小朋友係唔會存在「犯罪意圖」，所以大家嘅小朋友去邊玩都好，即使喺自己屋苑會所，都真係要睇緊啲，就算有任何損傷都只能夠循民事途徑索償，重要花費時間同金錢，而小朋友已經活受罪；加上除咗自己屋苑住戶落會所playroom玩外，重會有住戶帶朋友入去玩，若然被呢類別人士一走，就更加難以追究，俗稱「冇仇報」

開始入正題

朋友個女6歲，適逢中秋佳節，好不幸運喺下午於自己屋苑會所遇上咗一段不愉快經歷

婆婆帶佢落去會所playroom玩，個playroom其實好細，不過當時唔知咩原因容許所有人士自出自入又冇人理。玩玩下就有兩個大概3, 4歲貌似讀K1嘅男仔連同3位家長入去玩，屈指一算，playroom入面其實得4位小朋友同5個大人

好不幸地，我朋友個女被一個以訪客身份入去嘅嗰個小朋友拍打面，而且打到口罩都甩埋，避開後往前帶返口罩又被佢追住拍打背面。我朋友個女知男孩細個，就一直禮讓佢，亦打算同婆婆着鞋離開，但個男孩仍然追住拍打

雖然冇傷，但係小朋友都知道咩叫痛；話就只係3, 4歲，但小朋友無情力都可以好大。觀察下應該無外內傷，但都即時感覺好痛，所以最後我朋友個女重喊咗出嚟。而最可惜嘅係，打人男孩嘅媽咪喺度都無出聲制止，反而佢個朋友男住客中途都有大聲叫個男仔唔好打人，不過就無上前制止啦

幸好件事發生經過嘅最後部分有會所CCTV能拍攝到，然而設施入面被男孩拍打經過就拍攝唔到，無從追究。婆婆因未遇過呢啲情況，只好帶小朋友離開同通知我朋友，無喺playroom要求即時處理，惟最後返到屋企就同剛回家嘅媽媽講

聽畢，朋友就立即打去會所問個明白，叫佢哋翻查CCTV，著會所幫手搵返住客出嚟問，一問之下，始知道原來係該住客帶入嚟嘅朋友個仔。我朋友見個女無大礙，但都擔心佢情緒受到影響，因為一直以來都教育佢做錯事係需要先親身真誠地道歉，再睇下如何處理

其實，我朋友只係希望收到真誠道歉而已

及後，我朋友亦表明立場只求道歉，經會所幫忙協商後，帶朋友的住戶回覆話拍打人的係佢哋朋友個仔，佢哋會願意講對唔住。然而卻出爾反爾，話始終都係個小朋友做錯應該要小朋友自己道歉，再話會嘗試幫手搵個小朋友個家長約過嚟會所親自道歉，但係需要第二日先能夠回覆，因為當晚住戶需要返工

直到第二日早上，我朋友收到會所聯絡，話住戶回覆剛剛放工未能聯絡佢朋友，俾時間佢。最後下午再回覆我朋友，話男孩父母會願意道歉，問我朋友拎電話約時間前電話聯絡

可惜結果仍然非常令人失望，我朋友並沒有於約好的時間收到來電。會所職員幫手打去查詢，對方反而要我朋友自己打過去?

最後我朋友打去，對方爸爸態度非常堅決，認為佢孩子唔需要道歉。起初話唔係事實，冇人見到，所以唔需要道歉。之後我朋友話會所職員已經翻查了CCTV，五個大人十隻眼其實都望到，都重未計其他小朋友，重有一個小朋友去安慰朋友喊緊嘅女，咁樣都可以係冇發生過嗎？

對方爸爸靜咗一陣唔識答，之後繼續話因為已經離開咗，而唔係當時即時處理，所以係唔會再處理返。我朋友聽完覺得O咀了！真心，我聽到都O咀！然後唯有報警處理，對方亦接納

警察到場後查看CCTV睇到情況，確認事實係男孩追逐朋友個女，然後再於其身上拍打。帶朋友的男住客唔肯落嚟，直接俾咗事件中男童父母聯絡電話由警察溝通。講咗差不多成個鐘，最後警察同我朋友講話男童父母明天會肯真誠同我朋友約明天帶埋個仔親自來道歉完事，我朋友話接受，所以警察都離開

當中警察都有同我朋友講點解佢哋即晚道歉唔到，原因係該名男童去咗親戚屋企住，瞓咗覺而且未知明天安排，會於明天致電約我朋友。我朋友聽後覺得合理，姑且信埋佢一次

當然我朋友都預咗佢只係敷衍警察，因為我朋友已經聽咗兩次話該名父母肯帶同仔仔道歉，而最後卻要我朋友報警協調。幸好警察要求會所職員做證，如果該男孩父母反口，叫我朋友到時再報警

直到今天早上，我朋友收到電話，就係該位男童父親打嚟。男童父親純粹話講解返當日情況，因為警察叫佢打嚟同我朋友講，男童父親話佢仔係「冒犯」到我朋友個女

我朋友再問有關道歉一事，男童父親堅決拒絕：「安排唔到時間」

我朋友：「喺電話都得㗎，只要係個男仔親自講」

男童父親：「過咗三日細路仔邊記得？」

我朋友：「?」

我朋友個女都識喺隔離講：「邊有三日，兩日咋嘛」

然後男童父親又講一輪佢唔同意、佢唔知道等等嘅嘢?

總括而言，男童父親就話佢個仔唔能夠同我哋道歉，而佢哋作為父母亦都唔會代個仔同我哋道歉。最後我朋友都好似講耶穌咁勸佢唔好咁樣教佢嘅小朋友，但男童父親好理直氣壯地回答我朋友「我個仔無犯法」，而且重講咗好多次個CCTV睇到個女仔走嘅時候已經冇喊

當時我喺我朋友隔離聽到都呆咗！（雖然都知道事實刑事係告唔入，但係都唔使咁態度吧？）男童父親講到咩都唔同意，咩都唔係事實咁啦。朋友就問佢女可唔可以親自同個叔叔（男童父親）講當時情況？最後男童父親連線都收埋

唔知係咪我朋友同男童父親講想知道男童學校係邊間，如果可以的話聯絡學校幫忙處理，所以男童母親終於肯打返嚟同我朋友直接對話。男童母親先話唔想煩，之後我朋友同佢講話只需要道歉，但男童仍然父親拒絕。個媽媽就話男童父親指摘我朋友態度差，所以佢老公先會唔肯道歉

我同我朋友又O咀了。我朋友零粗口，已經非常客氣地交代事情經過，亦都問佢哋幾時可過嚟道歉。反觀男童父親一聽電話就聲線輕佻，矢口否認曾發生咁嘅事，所以先傾唔到下要報警，拎CCTV嚟睇！唔係我朋友話打俾呀Sir一齊傾的話，男童父親都唔會承認佢個仔真係有郁手「冒犯」

之後佢媽媽交代返當日嘅嘢，交代返佢小朋友年紀細，而且重有個newborn在家，我朋友大部分理解並且接受。然後朋友個女亦終於有機會親口同男童母親講返當日情況，然而男童母親第一時間就係引導我朋友個女

男童母親問我朋友個女：「係咪我個仔玩緊Spider Man之類？」

朋友個女堅決答：「唔係！」

我哋一路聽，一路覺得男童母親反而教返我朋友個女，佢話要同細個嘅小朋友講話停：「你叫佢就會停架喇」

其實我朋友個女原意就係禮讓同守規矩，唔想嚇親小朋友先自行離開，只不過係個男童繼續追佢

不過呢個都唔係重點，重點係原來有人會覺得小朋友去玩，做大嘅小朋友係需要幫手教育佢個細嘅小朋友，即係佢覺得佢個仔係細個嘅，因為得三歲?，但個呀媽就反而可以同家長朋友傾計傾到3歲仔「冒犯」咗人都唔知?，重話自己之後叫停咗個仔，想出嚟表達嘅時候，婆婆已帶埋個女仔走咗。但咁得意？你哋想表達嘅態度係你老公講咗不下10次，就係話「離開咗，唔係當場處理就唔使道歉」

最後最後，男童母親話可代佢個仔同我朋友個女講唔好意思，但我朋友只係想佢講嗰三個字！好彩佢都肯講，我朋友個女都接納咗

「對唔住」呢三個字真係咁難講出口嗎？我同朋友都係第一次覺得原來有啲人面對「對唔住」呢三個字係咁難講出口

小朋友碰撞真係少不免，但係都有分有心定無意，要孩子懂得明辨是非，同做錯事真誠悔改，教育返自己小朋友，相信大部份人都會很願意接受

讀者投稿@Mandy chan