#ParentLicenses1945

做咗呀媽之後，接觸多咗家長，發現好多港爸都幾小家。唔係想針對香港男士，不過我自己真係有好多唔好嘅經歷

之前同歲半嘅小朋友上親子playgroup，要家長陪同。我小朋友頭幾堂上playgroup，仲未學識聽指令坐好，由一開始已經周圍跑去邊邊摸牆搵玩具

個場地都算大，基本上佢就係長期自己匿咗埋一邊自己玩，都無話有噪音，同其他人都保持好遠距離，你有你上堂，佢有佢玩

我都有盡量抱返佢返嚟教佢聽老師講嘢，期間我有留意到有位爸爸一路上堂一路睥住我小朋友

後尾到自己活動時間，嗰位爸爸個女想走過嚟我小朋友身邊玩。嗰位爸爸即刻拉開咗個女，然後超細聲咁講：「唔識教就咪上堂啦」

聽到我都覺得幾唔舒服，就調咗第二個時間上堂。過多一兩堂，小朋友適應咗之後，已經可以大部分時間跟到老師指令

另外有一次同小朋友上完playgroup，我自己帶住佢落停車場同爸爸會合。嗰棟大廈得好少?，同埋長期多人，所以要排好長隊等?

當時我拖住我小朋友，放一放手想拎張紙巾，佢就一支箭向前跑，我即刻衝去捉返佢返原位，成個過程都係十秒左右

我一跑去捉返個小朋友嗰下，前面嗰位帶住兩個小朋友嘅爸爸即刻好大聲又好不屑咁講：「嘩！乜而家啲人扮走失個細路嚟打尖都得㗎？」

我都明白香港人成日喺迪士尼俾人打尖打到躁，但如果你有不滿嘅時候直接講句「小姐麻煩你排返去後面」相信會好好多

指桑罵槐其實係好無禮貌同唔得體，若然小朋友學咗呢種說話方式，我認為都會幾影響社交

又有一次喺街行行下，我小朋友無啦啦瞓低，我即刻想抱佢埋一邊唔好阻住條路

正當起身嗰下，有個爸爸用架BB車好大力撞埋嚟，然後好得戚咁同佢太太講：「啲人以為條路係佢嘅就預咗俾人撞㗎喇」

喺香港真係發生過好多呢啲事，我唔係批評緊啲爸爸唔包容，的確我隻B真係甩繩馬騮

重點係，我從來無遇過爸爸有不滿嘅時候會直接講，每次都係態度好差地指桑罵槐同做小動作

反而媽媽會好啲，甚至有時喺公園或者排隊嘅時間，當見到你手忙腳亂時，會同你傾兩句分享下自己經驗

讀者投稿@港女呀媽