#ParentLicenses1938

我係90後，生咗一個仔，阿仔今年5歲

最近一家人出去同朋友食飯，我仔同我朋友個女玩得太開心，佢捉住人哋個女又攬實又拖實唔放，重錫咗面珠一啖。小女孩（6歲）立即推跌我仔，接著同佢媽咪講好唔開心

我立即同我朋友一家人道歉，同時亦有即場教返個仔唔可以咁樣做，我朋友兩公婆都唔知道原來個女會因為咁而唔開心。當晚我哋嘅話題就係點樣去教育我哋嘅小朋友去保護自己，然而我老婆成晚都黑晒面冇乜出聲

返到屋企後，我老婆隨即鬧我：「點解要同人哋道歉？小朋友錫下好正常。點解要鬧自己個仔唔啱？人哋個女推跌自己個仔都唔擔心？！」

我想講我老婆真係發仔瘟到上晒腦，佢而家乜都話為咗個仔好，唔放心俾工人或者四大長老湊。堅持要辭職自己湊都算，五年來冇做好一樣家務，連阿仔玩具都唔抹唔執（唔執係因為屋企細，收拾完轉頭都會玩）；每日出街同阿仔食早餐、午餐，晚餐就等婆婆來煮飯，冇煮就叫外賣

我唔怪佢，湊仔唔易我知，唔執屋我可以執，唔煮飯我打電話叫外父外母幫幫手煮住家飯都ok。唔講佢成日同阿仔一齊沖涼，你覺得佢重細想行日系我都管唔到；成日post同阿仔嘅咀對咀合照上社交網站，食飯又咀、去玩又咀、睇電視又咀、搭?都咀

其實我唔係呷醋，而係阿仔都開始大個，係唔係應該要教佢男女有別呢？

而家阿仔5歲你唔教佢，咁將來會點？我要返工，真心冇可能全心全意陪住個仔

我放假想家庭樂，一家人食飯、行街、買衫、去掟彩虹，你就話星期六日多人，唔想同人迫，但就帶阿仔去迪迪尼

我話同阿仔去迪迪尼玩，做埋年卡啦，你又話平日返工去唔到嘥錢，咁我自己去買門票又話唔抵

我帶阿仔去男廁小便都唔俾，話嚇親佢

我要同阿仔傾計或者講道理，老婆就衝出來攬住佢、幫住佢，我講十句都唔及媽咪講一句好

攬仔唔係唔好，有時走火入魔就唔太好。我深信我老婆第時都係嗰啲攬住個仔唔放，當新抱係敵人嘅奶奶。我真係同佢溝通唔到，定真係我做錯咗？大家評一評理，俾啲意見

讀者投稿@蝦仔爸爸