#ParentLicenses1937

我媽廿一歲生我，呢生人聽得最多嘅一句係「唔係因為有咗你，我一定唔會嫁俾你老豆！」講到好似係我用支槍指住佢個頭，逼佢要俾人搞咁?

我一出世，佢就將我俾咗一個人湊直到五歲。湊我呢個人動不動就打我，有時打到我有傷痕就同我媽講係我曳自己整親，然後我又會被打一次。最嚴重係有次我K3時，湊我嗰個喺廚房切切下嘢，突然拎住把刀切我耳仔，當時只記得我掙扎咗好耐，但已經唔記得係點走得甩

返到幼稚園，我捽捽下隻耳仔，突然耳仔同手全部都係血，啲老師嚇到即刻打俾湊我嗰個，重驚動埋我老母。事後我當然又被打一身，原因係：做乜搞到自己流晒血?

我又好記得，無論冬天夏天都只可以瞓地下，咁嘅生活過咗5年，直至我6歲，當我媽接返我一齊生活，真正惡夢才正式開始

我媽有句口頭禪「我同亞妹就係公主，你就係乞衣」，基本上我做乜佢都唔滿意，對我永遠黑起塊面，三日一小打，七日一大打

究竟我係咪曳到咁，令佢咁憎我？其實我細個都係同一般細路無乜分別。點解佢就係咁？對我同對亞妹差天共地。佢話到我大咗，我就會知點解佢會咁對我

然而，即使到現在，甚至都有自己家庭，有埋小朋友，我都重係唔明

呢啲事我好少同人提起，就算親如老公都冇講過

記憶之中我有同嫲嫲講過，佢就話：「唉，呢啲嘢已經過咗咁耐，重提嚟做乜丫？唔好再斤斤計較啦！」

當刻我O咗，原來世界係咁運作？

雖然童年過得並不好，雖然未感受過母愛，但已作為媽媽嘅我，時時刻刻提醒自己，要走出我媽嘅影子，唔好俾原生家庭影響

我知係好難好難，但我會盡力

讀者投稿@S130