#ParentLicenses1930

最近好似多咗啲「未玩夠唔好生仔」系列，有感而發都想講下自己故事

我父母係先有後婚，至少係有責任感嘅。最有責任感唔係因為佢哋有咗而結，而係因為就算胎兒只有三個月就流產咗而仍然堅持結婚嘅決定，當然後來好快就有咗我，而我出世時，我媽重未夠18歲

我細個時佢兩個返工，而我就由嫲嫲湊大。佢哋週末會過嚟睇我，其餘時間佢兩個住喺一間佢哋自己買的木屋（後來遷拆上了公屋），所以其實佢哋無乜湊過我

我爸話某次佢週末接我返屋企住（未夠一歲），我喊到收唔到聲，面色都紫埋，佢好擔心我會斷氣，就寧願半夜坐的士送我返嫲嫲度。佢好自豪地認為佢咁係對我好好，因為喺四十年前搭的士由柴灣到荃灣係好貴的。然而我感受完全唔同，只覺得如果你唔識湊就唔好夾硬帶我返屋企啦

佢哋會俾家用嫲嫲，自己就唔教亦唔湊，但都明嘅，搵食嘛。有一次，幼稚園老師同我媽投訴我啲字寫得好醜樣，佢先發現真相係啲功課由嫲嫲寫嘅，但嫲嫲唔識字根本亂寫。嫲嫲嘅說法係因為我拖功課佢睇唔過眼，所以先自己寫咗佢

自始之後，就由同住嘅細姑姐教我功課。我細姑姐好惡嘅，所以無乜嘢我都唔會特別問佢功課，於是我成績經常都麻麻地，而我父母學歷唔高所以無干預過

直到我升小學四年級時有新嘅班主任嚟，同我媽講我上堂睇黑板會「矇豬眼」，著我媽帶我去做視力檢查，結果診斷我有高度散光，所以我根本睇唔清楚。戴左眼鏡後，我四年級上學期全班前10名，四年級下學期全級第2名，之後功課一路都無問題

我父母每年過年都會同朋友出去玩（啲朋友年紀同佢哋差唔多，但無小朋友），跟團去大陸，而且從來都唔帶我哋兩姐弟。有時啲老師放完寒假、暑假都會問啲同學有無同屋企人出去玩，我先發現原來其他小朋友係會同父母一齊去玩而唔係只有父母自己去

某年暑假，我去我外婆屋企過，無人過問過我暑假作業。直至開學前兩日，我媽發現我完全無寫過，重叫佢細佬妹——即係我舅父同阿姨一齊幫我寫

以上種種，足以令我相信佢哋係唔關心我功課同成績，當中我爸爸從無意見，我考得好同唔好都無表示，但佢係一個好要面嘅人，我考得好時佢會同朋友認屎認屁

直到考會考（HKCEE），我深深受到打擊

我文科會考14分，唔好但又唔係最差，讀唔返原校但重有書讀。放榜當日已經搵到學校收，全程我自己負責

夜晚阿爸問：「你考成點？」

我：「14分升唔到原本學校，但XXX學校已收讀中六」

阿爸再問：「咁原校要幾多分？」

我話：「原校要20分」

阿爸竟話：「咁我同朋友講你考19分」
.
當時我呆咗，我唔知應該有咩反應，心好痛——乜原來你care咩？你從來無關心我讀書喎，要唔要補習定買參考書無問過，又從不過問我校內情況，而家先認為我考14分好失禮而要同朋友報大數？你平時認屎認屁都唔會同我講，反而今次講到咁明？

縱使心中好多宣洩，但打擊實在太大，當時我無出聲，已經唔想同佢再講任何嘢

後來我結婚有自己小朋友，回頭先發現佢兩個對我影響好大。首先，如果我在乎結果就應該參與過程，如果我無參與到過程，其實憑乜要求好結果？另外，我仔細細個就同我哋一齊出國玩，我哋去邊都一齊去，帶住奶粉尿片都照去

近年有次機會，我爸忽然問我同細佬：「我哋係唔係好父母好榜樣？」

我內心「哼」咗一聲，但我無口出惡言

我同佢講：「你哋細細個就結婚生仔，未玩夠，唔識湊唔識教，去旅行都淨係識同朋友去無帶埋我哋，我哋平安長大無學壞已經算係咁」

佢當然唔會知當年老師話「你父母去旅行都唔帶你哋去梗係因為唔乖」，更唔會記得會考時講過嘅嘢，所以即使再提呢啲往事已經無意義，而且佢哋都為咗小朋友負咗咁多年責任，已經好過好多父母，至少令我提醒自己要玩夠先好做人父母

註一：會有人話點解睇唔清楚自己唔出聲。Sorry，當你未睇清楚過，你就唔會知咩係「唔清楚」。其實我連睇電視都會「矇豬眼」，但係佢哋無注意。我有朋友佢單耳失聰，好後來先發現佢父母又係話「點解聽唔到都唔出聲，錯過黃金治療時間」，朋友就話「我唔係聽唔到，我一路都聽到，人有兩隻耳仔，我以為是旦一隻聽到就得，我點知係要兩隻都聽到！？」

註二：之前都會嬲嬲地佢兩個，但人大咗又做咗父母，就會理解佢哋真係年紀太輕就做咗父母，而佢哋成長過程更加天生天養，唔會覺得自己咁做有問題，所以已睇開。我平時對佢哋都算孝順，會買禮物，帶佢哋去旅行，唔同住都間唔中虛寒問暖

圖片來源@早熟
讀者投稿@9527