#ParentLicenses1910

小編你好，又係我呀

延伸閱讀：
#ParentLicenses1882 https://parentlicenses.hk/?p=2841
#ParentLicenses1880 https://parentlicenses.hk/?p=2833

講返少少背景先，話說阿仔上個月尾，喺公園馬騮架跌咗落嚟整親手，骨裂加埋傷及筋健，要打石膏到月尾先再見醫生。好多嘢好似時光倒流去返BB咁要幫阿仔，我哋連自己阿仔都未搞掂，想我哋點幫人呀？

話說就嚟放暑假，叔仔一對仔女準備接返嚟。老公話，暑假十零日左右，又想我幫手湊埋，不過今次老公唔敢自己應承，直頭叫叔仔當面同我傾，又如前文所講，我一早已經企硬唔會幫

老公順便重提九月開始，叫我幫手湊埋返學，到咁上下時間叫侄仔女喺樓下等我，我哋行路返學，一定會經佢哋屋企，就想我一齊湊

講就容易，做嗰個又唔係佢兩兄弟，講我都識講「好近啫，喺阿仔學校後面」。但唔好忘記，一攞要攞三個書包，好天曬落雨淋，即使阿仔學校距離侄仔女間學校成十分鐘路程，講就好近，做就唔近

點解唔搭校車？因為叔仔屋企距離港鐵站好近，只需五分鐘就到，返學係必經之路

然後，如果佢兩兄弟再打蛇隨棍上，要我放學再幫手湊埋？我一定話「放學湊唔使諗，根本冇可能」，因為間間學校放學時間都係咁上下，咁接侄仔女先定自己阿仔先！？

再講，有一，就有二，就有三。順便教埋功課？自己仔女已經唔睇唔教功課，除非阿仔唔識嚟問啦；再然後，食埋飯沖埋涼？！有冇可能呀？

就算肯俾錢，俾得幾多？當你俾得幾千，我做part time都有；如果收叔仔市面價，我肯定佢會話貴

好彩嘅係，男家親戚（爺爺嫲嫲已經走咗）全部企我呢邊，都叫我唔好湊，話我自己有兩個，點幫到手

讀者投稿@小人物