#ParentLicenses1909

回應 #ParentLicenses1903

延伸閱讀??https://parentlicenses.hk/?p=2958

一、個女幾歲人仔，讀緊小四，故事雙方都係全職媽媽

二、我哋屬小康之家，有車，要供樓，唔多閒錢，但起碼有錢儲。一向教育個女乜嘢係「想要」同「需要」，基本上會盡力滿足個女包括物質，但要用行動或承諾來換取想要嘅嘢。一直都教導佢所有嘢都係得來不易，之前班主任都覺得佢逆向思維都唔錯。一直都好鍾意好愛錫爸爸，係近年個女明顯對爸爸態度差，對我冇嘢

三、同學仔係同班，住同一屋苑，佢爸爸同樣要供樓，佢屋企近來重新裝修，買新鋼琴8萬，用最新iPhone，富貴過我

四、我明白要好好教育個女嘅思想，但每日返學都見到同學，學校興趣班又一齊上，我講十句都唔及朋友講一句。自問我好有耐性，盡量循循善誘，我甚至乎搵學校社工求救，而爸爸亦幾乎每一晚返屋企食飯時，都爭取同個女相處機會（我屋企習慣飯聚，食飯會熄電視，大家會分享吓今日發生嘅事）。然而，情況越來越差，個女表面冇事，但內心越來越睇唔起個爸爸?

五、朋輩影響真係好大。社工話如果有親子輔導班就會俾佢哋同爸爸一齊上，同學仔媽咪知道後講晒粗口話多餘。而家只係希望轉校之後，聽少啲畸形理論，希望個女重新認識爸爸同家庭嘅概念

其實件事都擾攘咗接近年幾，今次揭開事件後，見到好多網友都有唔同嘅意見，都好多謝你哋。我都明白呢啲人周圍都有，可能轉校情況都係差唔多，但我希望喺我能力做到嘅範圍內可以嘗試改變一啲已被扭曲嘅價值觀。爸爸其實真係冇可能可以好似我咁廿四小時放晒喺個女身上，一個人搵錢養家唔易

最後想同同學仔媽咪講：多啲包容，少啲埋怨，其實會好幸福

讀者投稿@同學媽咪