#ParentLicenses1891

我細佬（18歲），有個拍咗幾個月嘅女友成日帶上屋企

細佬頭一兩次帶佢女友上嚟，我哋都好歡迎，但一個禮拜嚟我哋屋企瞓5, 6次就開始有啲厭煩

未加佢女友，本身我哋有6人住，自佢女友嚟住後，每個月嘅水費由980幾躍升至2千幾，原因係佢女友沖涼沖成個幾鐘

先唔講我父母開埋聲叫佢哋「沖涼沖快啲，水費好貴呀」，竟然都可以當你冇到（不過水費唔係我交，我就唔理啦），但入我（19歲）房問都唔問就唔ok囉！

我同我妹一間房，我細佬一間房，父母一間同嫲嫲一間。我同呀妹間房個櫃有塊全身鏡，係我同呀妹喺淘寶買返嚟自己痴。平時我細佬入嚟照都算啦，但佢女朋友都成日唔敲門自出自入

我呀妹（13歲）都成日細細聲講：「個姐姐好冇禮貌，入人房唔敲門」

佢女朋友重要成日用我同呀妹啲嘢。點解知？因為我同呀妹啲嘢最近成日離奇消失，問屋企人又冇人認拎咗，所以我哋裝咗個閉路電視喺自己房，睇下係咪有人趁我同呀妹返學就入屋偷嘢。點知睇到係我細佬女朋友趁我哋唔喺屋企或喺廳睇電視時入房拎我哋啲嘢，有香水、防曬、handcream等等

我同呀妹都好嬲，就同細佬講話：「你女友以後入我哋房講聲」

細佬話：「我唔知我女朋友入你哋房，會同佢講」

我呀妹13歲都識講佢去人哋屋企絕對唔會未經人批准就亂入人房，都唔好話用人哋嘢啦。呢啲嘢唔使人講啦下話，18歲啦都，真心唔知佢屋企點教女！？

讀者投稿@入人間房唔洗問？