#ParentLicenses1866

我老豆已經60歲，而我只係18歲

我好憎佢嘅性格，例如有錯唔認、推卸責任、強行轉移話題等等

情境一

當時老豆想拎走把風扇，可能見唔到個插頭以至無拔走，結果扯住咗成個插座，我部充緊電嘅手機就被連累跌咗喺地下

我：「喂，小心啲丫好唔好？同埋我部電話好彩冇俾你跌爆咋」
（唔好問我點解呢嗰語氣，因為我同佢關係都唔好，加上我之前部手機又係同一個位置充電，又係俾佢用同一個方式扯跌，結果跌裂咗部手機後蓋）

老豆：「跌爆咗電話你自己賠錢維修囉，同埋你點解要擺手機喺度充電？」

我：「？？」

情境二

將近出門去食飯，但喺屋企同老豆有啲小爭執，搞咗一大輪之後終於出門口

當時坐小巴落咗去之後，老豆話自己漏咗部電話喺屋企，要坐車返去囉，咁我同阿媽就唯有去咗餐廳先

一輪之後，佢終於到咗餐廳

阿媽：「都同你講好多次啦，出門口之前check咗嘢先再出門口，唔好成日出咗門口之後，先發現自己漏咗嘢」
（佢經常出咗門口之後先發現自己漏咗嘢，好幾次返工出門口，然後臨急臨忙返來囉嘢）

老豆（望向我）：「我記得有個大頭蝦成日唔見嘢㗎喎」
（呢嗰大頭蝦就係我，前幾日先唔見咗張個人八達通?‍♂️）

我：「而家講緊嘅係你成日漏嘢嘅事情，你真係幾勁喎，咁樣都可以扯到我頭上？你不如改善下唔好成日漏嘢啊」

老豆：「咁你解釋一下你成日唔見嘢原因啦？」

我：「？？？？？？」
（XYZ）（你老＊＊＊）（＊＊＊＊）（＊＊＊＊＊＊）（＊＊＊＊＊＊）

兩個唔關連啲嘢，佢可以扯到一齊，佢真係幾勁下嘅

係唔係逢老一輩啲人都唔肯承認自己唔啱？非要喺度死雞撐飯蓋？承認一下自己有錯係咪真係咁困難？

讀者投稿@不知道