#ParentLicenses1837

帶小朋友去玩真係要時刻睇實，不要離開小朋友太遠，否則就同這位家長一樣，小朋友被大鬧到好驚

話說，有名家長聽到有人咆哮去睇，先知係自己小朋友被鬧。當時小朋友已被嚇到震，試想想佢係幾無助，係幾驚？

【該名家長的故事如下】

昨天29號18:30 左右，我在屋苑會所三樓用電話期間，突然聽到有把男人聲持續咆哮大叫，聲音響遍整個會所，各層都有人探頭望望發生咩事

我家小朋友當時在一樓，當下我立刻衝落去，發現原來有個男人對住我小朋友不停大聲鬧

小朋友 （5歲），見到我就緊緊攬住我哭，手口都震埋，身體在抖

我問個男人發生咩事？點解要失控咁鬧我小朋友？

個男人（50歲左右）話我小朋友攻擊佢個仔，佢個仔（13-14歲左右） 成年人高度，話如果用真刀真槍點算？

為公平起見，我問我小朋友，你剛才用咩攻擊到哥哥？但呢個時候我小朋友已被嚇到開唔到口

對方繼續指駡，我稍為拉開小朋友再問清楚，小朋友對我講無攻擊過大哥哥，只係身邊經過時可能掂到佢哋

呢個時候，我向對方講個事件經過，我叫我小朋友向對方道歉，但對方仍破口大駡

OK！

到咗呢一刻，我都想攪清楚，究竟我五歲小朋友用乜嘢攻擊對方十幾歲嘅仔，而要令到呢位男士失控咁鬧我個小朋友呢？！

我決定報警，翻看 CCTV。迷底終於解開，原來只係一把近乎零硬度嘅發泡膠玩具長劍。大家看到都呆望當場

在場有幾位小朋友都俾呢位男士嘅叫聲嚇到喊，有認識的小朋友都說被嚇親，有素未謀面嘅家長都走過來說這個男士教小朋友時太失控，才知不是小孩的爸爸

我一臉疑惑，點解要咁大聲嚇親在場小朋友，同時我亦就對方誇大的所謂攻擊，要求對方向我小朋友道歉

對方擺岀一副厭棄嘴臉轉身就走

當時我都受驚了，我小朋友心裡一定唔好受

「媽咪，點解我係咁同叔叔講對唔住，佢都唔原諒我嘅？」「我好驚呀，以後都唔會同男人玩，我淨係同小朋友玩」「我仲記得佢把聲好惡呀」

事隔幾小時，小朋友食唔落飯，安慰小朋友瞓覺之後，到自己都平靜下來，忍唔住將事件記錄下來，可惜嘅係現在 CCTV 無錄音

我成晚陪住小朋友，半夜驚醒過，睇來真係受驚過度；今日重話唔敢去會所，邊度都唔去，驚見到個壞人叔叔?

【故事完】

如果當時家長在場，重會唔會俾自己小朋友拎住把發泡膠玩具長劍去整到人？即使整到人而俾人鬧，媽媽可以及時了解，至少不會只有小朋友單獨面對

當然男人咁惡係唔好，但責任始終喺家長度，令到小朋友咁驚都冇得怪晒個男人

大家住同一屋苑，以我今日觀察所得，估計再發生類似事情機會都好大，我自己當然會盡量避開啦，日後如果有其他家長遇到同樣事情，都可以見到呢個 post知道對方有前科

圖片來源@蠟筆小新
讀者投稿@學習做個負責任家長