#ParentLicenses1835

話說康文署有專為小朋友而設的流動圖書車，入面大部分係小朋友書，仲有桌遊玩。如果圖書車泊喺我屋企附近，我都會同小朋友上車借下書，玩一陣遊戲

前幾日，我同小朋友上圖書車，隔咗一陣有兩對母女上咗車

兩個小朋友一入嚟用標準普通話大聲傾計，揀咗書就坐喺度大聲討論書入面嘅內容，而家長就坐咗喺佢哋後面高談闊論

職員都有溫和提醒佢哋要細聲少少，但佢哋表示知道後，只係隔咗唔夠5分鐘又故態復萌

然後有位家長嘅電話響起，原來係提醒小朋友要上zoom。佢隨即問個女：「阿女，你想睇書定上堂？」

小朋友就答：「想睇書」

然而，家長應該都係想小朋友上堂，於是就同個女講：「咁你喺車度上埋堂啦！」

我當堂打咗個突，究竟呢位家長係咪當咗圖書車係佢屋企？職員都聽到，遂即刻同家長講：「呢度唔方便上堂」

家長不悅，就叫個女同老師講今日唔上堂。當然一定唔會落車講，甚至用擴音，令全架車都聽到佢哋同老師講咩

個女同老師請完假後，又好似啱啱咁一樣大聲講嘢，家長坐喺後面繼續傾計

未幾，愈嚟愈多人想上車，職員都呼籲車內人士可以借書返屋企睇。我同小朋友都揀緊書，諗住借完就走，佢哋仍然都係無動於衷坐喺度。直到佢哋見真係好多人想上車，先拿拿聲叫佢哋個女借書走

借書嗰陣，佢哋排我前面。佢哋家長借完3本，跟住佢個女攞多本書去，就想借多本，咁家長咪要拎多次張圖書證，佢阿媽邊搵邊同職員講：「你有俾返我咩？見唔到嘅」

最後家長喺佢手袋搵返，然後佢哋借完書就走咗，而我哋就整整等咗10分鐘

卒之到我哋借書嗰陣，我就同職員講：「辛苦你哋」，相視而笑

讀者投稿@小薯家長