#ParentLicenses1830

近年移民潮席捲香港，係咪有考牌嘅父母就一定揀移民？唔移民就係罪人？

老公好想移民英國，三日唔埋兩日就講「識得邊個邊個又走，邊日又要去farewell」「阿邊個喺嗰邊日日好開心」「邊個又問我哋拖住兩件細嘅點解仲未走？」而且幾乎日日都洗腦式咁播住介紹移民英國嘅YouTuber片，好似想話我知，全世界都走，得我賴死喺度

老實講，我都明白點解個個要走，都不外乎係要呼吸自由嘅空氣，俾更好嘅環境子女讀書成長云云，但又有冇人理解過我有顧慮嘅原因？

首先，我係一個在職媽媽，我嘅職業有幸被稱上為專業，需要讀書、實習、考牌，先做到呢行。而家呢份工作，無論性質內容、工時工資，定係人事關係，我都幾滿意；放工真係放工，冇手尾跟，又容易拎假，方便照顧小朋友

假設真係過到外國，先唔講要經歷重新讀書、實習、考牌嘅過程後，先可以做返老本行，就算可以重操故業，都好大機會要返shift同假日。我以前試過返shift，先知道有固定工作時間對小朋友係幾咁重要，所以更加珍惜而家呢份工

另外，我自問已經過咗讀書嘅黃金時期，無論熱忱定記性都大大退減。如果過到去後，要一路湊住兩件，一路擠時間出嚟溫書做project，我好懷疑自己究竟有冇呢個能耐

可能有人會質疑：「馬死落地行，咁大不了咪轉行囉！」

當然，我都聽過有case係放棄高薪厚職，過去從低做起，本住寧願過去做乞丐都唔留喺度做皇帝嘅心態移民。我真心佩服㗎，但係我亦坦白講自己冇咁瀟灑。十年寒窗終於有少少成就，突然間由零開始，又要重新為事業打拼，我呢刻仲未可以跨過心理關口，況且搵到嘅工種、工時、工資亦未必係我想要

「唔試過點知唔啱？頂唔順咪返嚟？」

係嘅，只係「試下」嘅機會成本太高。如果辭咗而家呢份工，就算返嚟都未必搵得返，始終行頭競爭大。做full time mum？不了，只能說我志向並唔係做全職主婦，而且我真係需要返工嘅時間嚟調劑下，相信媽媽們懂的

其次，我自細都唔係一個適應力強嘅人。自幼稚園升小，升中，再到升大學，每次我啲情緒都會或多或少受到困擾，需要學校社工、老師或親友輔導我一輪先得

「唔係嘛，咁少事都適應唔到？」

講出嚟我都覺得難以啟齒，但唔好意思，我適應力就係咁弱，好需要人一路扶持住我

既然升學尚且如此，更何況移民呢？我老公雖然唔可以話係豬隊友，但都一定唔係神隊友。每日返嚟都話「好攰」「尋晚瞓唔好」「冇精神，好大壓力」，一有時間就會碌電話或打機減壓，就算陪住細路都係機不離手

我唔係話自己次次啱晒，但同老公嗌交一定係我輸，因為我轉數唔夠佢快，講嘢唔夠佢叻。我又容易嗌交嗌到喊，佢就永遠唔會讓我，又唔俾人話得，講到一定係佢啱我錯為止，連我大肚嗰陣都照話到我喊

好似經常搵佢做少少嘢，都係三催四請，重要係未做，明明當下就冇重要嘢做緊。我睇唔過眼做咗，又會俾佢鬧：「做咩咁急做？」

如果冇做，到最後唔記得咗做，就又話我冇提佢做。喂大佬，我真係覺得好無辜，你會唔會應承老細客人做嘢最後冇做，然後賴佢哋冇喺適當時候提你丫！？仲話求人幫你做嘢就唔好大安旨意！？

我嗰次真係嬲咗，啲嘢係我嘅，屋企細路你冇份嘅，趁記得、趁細路瞓晒，先做晒正經嘢先打機唔得嘅，一定要享受夠。但到細路瞓醒要你幫手湊，先話要去做乜乜乜嘅

唔好意思，好似呻到樹葉都落晒。但我想講嘅係，老公完全俾唔到信心我，如果跟咗佢移民，到時人生路不熟，咩都靠自己，冇長老又冇工人姐姐幫忙緩衝下，老公又繼續係咁的話，我一個人冇晒緩兵點搞？

我似乎已經想像到，到時佢哋個個happy，我就一定會啞子食黃蓮咁，自己鬱到病。仲有，論住屋、環境、教育，香港無疑不能媲美英國；但論天氣、衣食、交通，個人都係認為香港更勝一籌。好似我咁怕凍，唔識煮飯又唔識揸車，去到英國要適應嘅嘢又多幾樣，究竟老公有冇諗過你老婆我可唔可以一次過應付咁多轉變？如果你真係了解我嘅話，應該知我不嬲都好怕轉變，要離開由細住到大嘅香港，跳出comfort zone，對我絕對唔係件容易嘅事，唔可以操之過急

再者，好多人話：「去外國嘅生活點都好過香港，過咗海就係神仙」

我唔懷疑存在好多成功移居嘅例子，講真，個個唔怕麻煩搞完一大堆嘢，勞師動眾過去，當然係想值回票價，話返俾人聽一切都係值得嘅

換轉係我，我都想報喜不報憂，說服人移民係正確決定。大家唔好誤會，我唔係想講啲人放流料，我相信有部分人係好享受移民生活，但會唔會同時都有部分人後悔而又唔敢講，又唔好意思返嚟驚面懵，又或者已經變賣晒家當，根本全無後退之路？我唔敢講

際遇嘅嘢冇得預料，過到去遇到咩人、咩事真係冇人知，但我向來做事習慣有plan b。若要我辭工賣樓先過到去，我實在唔鍾意呢種破斧沉舟式移民，不成功便成仁，但要投資移民咩又冇本事。如果有個契機可以過去試住幾個月，咁我都覺得可以諗下，但可惜呢刻係冇

第四，本人一向支持廣東話，用字博大精深，繁體字蘊藏精髓，呢種語言係世上最難學之一。廣東話始終係母語，我希望小朋友都對佢熟悉，識讀講聽寫，如果去到英國冇動力學，又冇得學以致用，我就覺得太可惜喇

另外，中華文化源遠流長，亦有其可取之處，譬如新年習俗、中秋端午起源、唐詩宋詞、成語、歇後語、飲茶文化等。去外國一定冇晒？咁又唔一定，但小朋友就未必咁深入了解到箇中意思囉

我唔係反對細路去外國留學，只係大嗰個而家先讀幼稚園，我想等佢哋對自己語言同文化有基本認識先，再送佢哋去外國擴闊眼界，難道有錯？

最後，老公話：「為咗下一代應該要走」

下一代固然重要，但上一代係咪就唔使理？長老們都好錫兩粒孫，成日幫手湊佢哋、帶佢哋玩。長老話咗唔會走，難道要咁狠心丢低上一代置之不顧？我自從生咗之後都好少返娘家，平日顧兩個細嘅，都已經冇咩時間盡孝。如果直頭遠走高飛，連見面飲個茶都做唔到，我覺得自己好不孝

雖然家父話無所謂，但我真係唔捨得。奶奶就更加唔使講，佢不嬲重男輕女，又周身病痛，得老公一粒仔，如果連老公同孫都走埋，我驚佢接受唔到

我唔知我咁諗係咪好自私、好唔啱，我係咪應該要打住「為下一代」嘅旗號，不顧一切，排除萬難向外闖？係唔係搏一搏，單車真係變摩托？

老實講，做人媽咪都係想俾最好嘅嘢小朋友，但移民一定係最好選擇？又係咪一定要為咗細路，而放棄自己嘅理想同上一代？係咪我太貪心？魚與熊掌真係不可兼得？

我都冇咩望，淨係望小朋友可以健康快樂成長，做個正直對社會有貢獻嘅人。假如接受香港嘅教育，係呢個社會生活，自身做好家教同身教，令細路都可以出淤泥而不染的話，唔係更難能可貴咩？

我都好想求高人指點迷津，究竟呢一刻唔舉家移民係咪等於推小朋友落火坑？係死路一條？我唔想做千古罪人

圖片來源@HK01
讀者投稿@罪人媽媽