#ParentLicenses1825

我係一名補習社老師，主要教幼兒會話、認字、寫字等等。相信大家都明白，學乜嘢都好，若果經常請假，學下又停下，呢啲都會影響學習進度

話說上年有位小朋友報讀咗個個別課程，佢係4歲的女孩子。其實佢都乖，係個性比較怕醜，但都抵錫☺

因為見小朋友有啲怕醜，喺課堂初期，頭幾堂我都有俾佢媽媽跟埋觀課，等佢媽媽知個教程，亦俾個安全感小朋友。不過佢媽媽通常在旁睇手機，冇任何觀課意欲。不過唔緊要啦，總好過係咁加把口干擾課堂嗰類家長

幾堂後，我見小朋友冇咁怕醜喇，都同小朋友媽媽講可以俾阿囡試下自己上課喇，咁佢媽媽都同意

然而，小朋友學嘢嘅進度其實麻麻，麻麻地嘅原因唔係因為佢資質所限，而係因為佢經常請假。佢雖然選擇逢星期六上課，但基本上每個月佢都會請事假

有問過佢媽媽：「會唔會轉其他日子上課，等冇咁易相撞你哋星期六嘅活動，咁阿囡可以穩定地上課？」

媽媽：「平日放學回來已經很晚，所以還是星期六比較好」

我都認同小朋友放學後，仲要遲返屋企係辛苦嘅，我哋都唔想個小朋友咁辛苦。然後，我都有問過佢：「媽媽星期日得唔得？」

媽媽：「星期日是休息日，唔會安排任何課堂」

都明嘅，咁就維持星期六啦，但佢仍然保持每個月都請假的紀錄

其實請假都唔係大問題，係每次請完假，礙於小朋友平日及星期日都不能前來補課，佢只能安排每堂分拆加時補堂，變相是隔咗個星期先再上課。隔咗個星期，個小朋友有啲嘢唔記得都好平常；呢個都唔緊要，唯有我幫佢再溫返啦，我唔介意耐心幫佢重溫返??

問題出現喇，每次隔一個星期冇上課，個小朋友都會忘記較多內容。每當我用較多時間再同個小朋友重溫時，呢位媽媽就會投訴

媽媽：「點解重複咁多上堂的內容，冇乜教新嘢？」

我嘗試解釋俾呢位媽媽知：「因為小朋友有啲嘢唔記得，所以要溫下先可以加新內容」

媽媽繼續自顧自地講：「總之我唔想要重複內容，嘥時間在之前已教嘅內容上」

Fine，咁我唯有之後見個小朋友識識地就照教多啲新嘢啦，點知問題又嚟喇

有一次個小朋友請完假返來，上完堂回家去，阿媽媽又打來反映：「點解我個女返到去，上一堂啲嘢好似仍然唔係好熟咁？」

我解釋：「因為你之前建議想學多啲新嘢，所以用較多比例在新內容上」

媽媽：「冇理由個小朋友唔識都唔理佢」

我在心裡呼喊著：「太太你究竟想點？如果你唔係習慣性請假，點會影響你個女的學習同進度呀！」

佢一輪咀後就收線?

個小朋友大約學咗大半年之後，就在今年年頭疫情一開始嚴重時，佢就停咗課堂。都明嘅，嗰排大家都擔心疫情，小朋友健康最重要。佢有啲堂未上完，因疫情我們都會體諒客人，容許保留餘下課堂，等疫情緩和再補，所以預咗佢會回來?

就在5月份，呢位媽媽就通知我哋會復課，打算上埋之前餘下的課堂。點知安排好的課堂，上都未上，就又話第一堂都係要請假。冇所謂，佢之前都停咗幾個月，唔差在呢一堂喇?

之後嗰個星期六終於見到個小朋友啦。幾個月冇見，我用復課第一堂去check下小朋友之前所有學過嘅嘢入面，有咩記得，有咩唔記得。小朋友有嘢唔記得係好正常啫（大家唔認同勿見怪），心底裡當然希望個小朋友乜都記得啦，仲要佢媽媽咁緊張我嘥時間在舊內容上，所以我已經好小心翼翼

不幸地，小朋友大部分學過嘅嘢都唔記得，OMG。在於職業操守，實在唔能夠隻眼開隻眼閉，由得個小朋友唔識，所以硬著頭皮都要陪佢溫習

不意外，幾日後真係收到佢媽媽打電話來

媽媽喺電話裡好唔客氣咁同我講：「阿老師，請問你今次又會要搞幾多堂去重溫呢！？」

我語帶友善：「其實我都想今堂可以即時教新內容，可能停咗課一段時間，阿囡真係好多嘢唔記得」

媽媽：「我明明呢幾日已經有幫佢溫下習先去你到上堂，邊有可能會唔識呀？！」

我繼續語帶友善：「因為阿囡大部份發音都唔準，之前學咗嘅生字有部份唔係好記得，所以我先要花時間重溫，否則基礎唔好，再教新內容會更加記唔晒，希望你明白」

媽媽：「總之舊內容我會同佢溫習啦，你教佢新嘅內容，唔好再嘥我哋嘅時間同錢！！！」

然後媽媽就收咗我線

我其實想叫佢：「不如你自己教返啦?，我真心唔係要拖你時間的，你自己不停請假繼而停課，但又想有進度，阿囡只係一個小朋友咋，就算大人學嘢，經常請假又停，都難有好嘅效果啦」

其他明白事理嘅家長，通常因疫情停課再復課嘅情況下，都會唔好意思地同我哋講，預咗佢嘅小朋友會有嘢唔記得，反而會主動提議我哋可以溫返之前嘅內容，重複再教係唔緊要的

大家互相信任尊重才是最重要❤

讀者投稿@墨汁