#ParentLicenses1816

講下我背景先，我未出世前個老豆已經吸毒，之後有個細佬細我幾年，我老母就喺陀住佢嘅時候開始吸緊，所以我可憐的細佬一出世已經有毒癮，要留院由醫生幫佢戒毒癮

唔知係咪因為咁，我細佬細個有好多問題，要定期去醫院覆診，但我老母太有責任心了，覆咗一排就冇再去。細佬到而家廿幾歲，頭腦都係唔得靈活，我有時覺得佢細個真係有受毒品影響，個腦好似有啲問題咁，其實都幾心痛佢

因父母吸毒，吸毒嘅畫面我由細睇到大。試過有一次，佢地匿埋喺房度上緊電，過咗好耐好耐都冇出過聲，當時只得六歲左右嘅我好驚，拍極門都冇人應，我真係好驚佢哋喺入面死咗。當時住7樓，於是我喺佢哋隔籬房個窗爬咗出去晾衫架，再爬去佢哋間房個窗度望

屌那星，原來佢哋上完電瞓死咗。而家每次諗起都覺得好驚，細個真係唔知個「死」字點寫，好彩我大命

吸毒嘅人，多數都係撈偏，所以監獄係佢哋第二個家。佢哋電話打唔通，就多數都係衰咗，俾警察拉咗，通常啲警察半夜就會錔佢哋返屋企搜屋。半夜好靜，我喺廳度等，佢哋喺門口講嘢，準備入門嘅聲都會好清楚。因為咁，我嘅童年陰影好大，如果自己一個喺屋企，聽到屋門口有人聲會好驚，心跳得好快，會即刻上床用張被包實自己。係近呢幾年結咗婚生咗小朋友，喺屋企有小朋友陪住先冇咁驚，我希望呢種陰影有朝一日會好返

因為父母長期出入監獄，所以我兩姊弟細個就好似個波咁，俾人拋來拋去。入過竹園（兒童院定兒童之家嘅地方），寄養家庭都唔知住過幾多個。當時我細佬應該一歲多啲，望住社會福利署嘅姑娘喺我面前抱走佢，要同佢分開嗰種心酸嘅感覺，事隔咁多年依然歷歷在目

住喺寄養家庭好長時間，有次我老豆放監先，但社工唔俾佢接返我哋，因為認為佢冇能力照顧我哋，所以只係容許間中俾佢探我哋一兩個鐘。老豆會帶我去食麥當勞，好記得有次臨走前佢塞多個包喺我個袋度，自從我每次食麥當勞都唔會食包

吸毒嘅家庭，多數都伴隨住家庭暴力呢個問題。我父母三日唔埋兩日就會嘈交、打交，原因都係離唔開錢同毒品。每當佢哋嘈交、打交，受苦嘅都係我，我老母會將啲情緒發洩喺我身上，又打又鬧，叫我出去做雞幫補家計，又或者叫我快啲去死

身體同心靈上受到嘅暴力，令我初中已經有抑鬱症，但唔識處理，只好將自己收埋。直到出來社會工作，雖然我老母已經成功戒毒，但家庭問題一直存在，而我嘅情緒問題好似越來越嚴重，體重急劇下降，晚晚失眠

於是我去睇普通私家醫生，遇到個好好嘅醫生，同我傾咗好耐計，問咗我好多以前嘅事，開咗啲普通開心藥同安眠藥俾我，但都係冇改善，佢話轉介我去政府精神科，但我好抗拒，我希望靠自己可以好得返

童年過得好差，千字文都根本寫唔晒所有痛苦經歷，幻想過無數次直接指住我老母嚟鬧。我好想將多年來嘅委屈同痛苦講晒出嚟，好想同佢哋講：「吸毒就咪撚生仔！社會垃圾！自己都未顧得掂學人生仔！」

然而，我知我唔可以咁做，因為怕佢唔開心又走返回頭路，所以都只係我內心嘅小劇場，而個老豆我就一直當佢死咗㗎啦，冇講嘢好多年，喺街見到都扮睇佢唔到

童年陰影到我而家三十歲都仲存在，不過已經比以前好好多了，以前真係好想快啲死，晚晚失眠又情緒差真係好辛苦！但自從結咗婚，有自己嘅家庭，生咗個小朋友，生活有動力，忙碌湊小朋友，有個好愛錫我、對我好好嘅老公，先令我有活下去嘅勇氣，因為我仲有個小寶貝要照顧，生活亦因為佢而充滿愛

雖然唔係大富大貴，但我覺得有父母悉心照顧，用心關懷，都可以開心成長，前提係父母要有責任心，唔好自己都照顧唔到，又有毒癮，又唔識帶安全套，走去學人生仔，我唔想再有小朋友喺呢種環境下成長，真係影響一生！

多謝睇晒我呢篇千字嘅你哋，祝生活美滿

圖片來源@門徒
讀者投稿@K