#ParentLicenses1815

專頁小編好，各位讀者好，寫嘢唔叻，唔好見怪?

見咁多負面post，諗咗好耐，我都忍唔住，好想同大家分享我嘅金句同金句來源

每次我遇到困難，例如性侵、虐打同癌症呢啲比較難過嘅關口時都係會同自己講呢句金句：「過到呢關，重有咩可以難到我！？」

小時候被阿媽斬，幸好鄰居之前已聽到嘈吵聲出咗嚟，及時拉閘扯我出去，就斬我唔到。我好幸運無事，之後就同自己講：「條命保得住，小事唔記住」

我有個碩士畢業但家道中落嘅爸爸，亦有個虐打我、斬我、賣我，同埋會為求生存不惜犧牲仔女嘅媽媽，亦都有幾個兄弟姊妹

咁多兄弟姊妹裡面，其實我出世算幸運，例如金鏈、無限嘅免費新衫、嘢食，同滿月酒都係得我有，直至幾歲嘅家道中落後，我就被轉移到一個虐打、捱餓、捱眼瞓，近似奴隸同埋受性侵嘅寄養家庭生活，而呢種生活我過咗幾年

好唔容易以為自己甩難返到阿媽身邊，原來一切都係假象。除咗虐打、捱餓不特止，重有斬我嘅恐懼等緊我。嗰陣真係有自殺念頭，覺得我係唔應該喺呢個世界生存。到後來佢生活都搞唔掂，所以就「賣」我俾爸爸

返到愛錫我嘅爸爸身邊，自知真甩難，無人再虐打自己就鬆懈、放肆不停玩，跟住梗係學壞。任性好多年啦，我重曾經試過好似其他分享嘅讀者咁，有埋怨過爸爸明知我讀幾間小學啲成績最多中等，但偏偏幫我揀間Band 1學校，結果俾人派咗去Band 5嘅不孝女

爸爸無放棄我，重因為我派得唔好，就有叫我試下去外國升學，然而佢無錢，話要靠我自己過去升中考獎學金讀。回想為呢樣嘢我都有埋怨過，覺得自己真心不孝

入讀一間Band 5，遇著個成日掃背脊嘅阿Sir，亦有因為知道同學屋企電話就被記小過等嘅奇怪事，而令我讀完中三就堅決轉去IVE

轉讀IVE後，我重可以邊讀邊做part time添，而喺呢間學校讀書都有開心嘢嘅，就係認識好多有錢好同學

當時我每個禮拜只會預算$100零用錢用嚟食晒成個禮拜早午兩餐，如果唔返嫲嫲度食晚飯嘅話呢，呢$100就要包埋夜晚餐飯，所以我平時係唔食早餐

漸漸落嚟，晏晝間中就係「痴」有錢同學嗌嘅外賣食，咁我就可以連買麵嗰$5都慳返。放學後，啲有錢同學又成日請我食麥記，咁樣真係救我小命㗎！

我幾個兄弟姊妹嚟自唔同嘅成長環境，嗰啲捱窮、捱餓、被睇唔起嘅，對於我嚟講算小意思，因為被打到吐血、或者好似我咁被虐打，甚至去到要斬嘅，呢啲事對我人生嚟講係屢見不鮮

直到我34歲生日前兩個禮拜，突然間開始乳癌惡夢，自此我覺得面對惡癌，帶嚟嘅恐懼係唔少得過家暴性侵，尤其是當你望住自己小朋友得幾歲，而自己又面對癌腫瘤最惡嗰種時，嗰種恐懼係筆墨難以形容

係咁易講咗我少少經歷同金句分享，或者對你未必有用，但我都想試下鼓勵大家，無論經歷咗幾多你認為唔開心嘅事都好，執著嘅過去只係你嘅負累，當你只記怨過去嘅傷心事，某日會突然發現失去好多，走向無限可能嘅前路，先係你精彩人生嘅開始吖

我今日重可以同家人見面，同你哋分享，我真係好感恩！最後想同你哋講句：加油！身體健康！

讀者投稿@自閉兒中女肥嘢媽