#ParentLicenses1810

地點：某小型連鎖樂園嘅半小時任玩設施
人物：港媽、工人姐姐、2-3歲仔仔、歲幾女女

佢哋一行四人入設施玩，相同時間下我小朋友都喺入面，所以我一直喺側邊睇住食花生

仔仔比較活躍，男孩子會係咁都明白嘅，工人姐姐就負責睇住佢；女女就俾媽媽擺靚靚喺馬仔上面狂影，眼尾都無望過個仔。女女仲要無戴口罩，不停喺度食波波池啲波?

後來媽媽越影越起勁，教工人姐姐點揸機影佢同女女瀡滑梯，呢一刻開始無人理仔仔啦。不知不覺間，仔仔已經捐咗入啲設施同牆之間

工人影媽媽同女女，媽媽又影返工人同女女，仔仔就自high，不亦樂乎。未幾，媽媽終於發現自己有個仔啦，又影下同仔仔玩先

工人影住媽媽帶住仔仔行上樓梯，點知一上咗條樓梯，呀媽媽就即刻擰轉身衝返去工人度睇下影得好唔好，仔仔又繼續獨自去偷歡。工人姐姐仲要影埋媽媽自己瀡滑梯，睇見工人姐姐真係好忙。如是者，玩咗（影咗先啱）半個鐘，媽媽個story應該有排睇

夠鐘時，場地開咪請xx號小朋友離開。叫咗佢哋兩個號碼5分鐘都唔出嚟，甚至遲過佢哋入嘅人都出晒場。工人姐姐就施施然抱女女出嚟，而媽媽就用佢把聲召喚仔仔，咁明顯仔仔無理佢啦，而媽媽都繼續自顧自，行出嚟除返自己對襪

啲職員企咗喺出口都好無奈，等極都唔出，最後媽媽先肯著返對襪入去抱個仔出嚟。跟住兩個大人就一齊處理個仔，輪到個歲幾嘅女女就唔知自己行去邊

以上我同友人本身都食花生咁食，但最後我哋發現到，原來女女一路著住對硬膠厚底襪，係直接踩地下嘅，佢本身無鞋著！亦即係佢其實一直著住對踩落地嘅BB鞋入去要除鞋著襪嘅設施度玩??

其實做人呀媽嘅，可唔可以尊重下自己嘅仔女，又尊重下其他人？

讀者投稿@食花生的塘邊港媽