#ParentLicenses1807

我本身嘅經歷影響我養仔嘅心態。我原生家庭係一個基層家庭，我細個住喺九龍城一個冇窗，地下再往下走一層嘅單位入面。我嘅父母窮，雖然佢哋好錫我，但佢哋都會打我。細個嗰陣有時會好憎佢哋，但人到中年就知道，佢哋教育程度較低，往往覺得「棒下出孝兒」，根本不能怪佢哋

年紀已到中年，記得細個時嘅嘢唔多，但回憶中大部份都係一啲比較負面嘅嘢

我好鍾意小動物，有一次我爸買咗一隻兔仔俾我，第二日我媽要我爸拎返去鋪頭

又有一次我爸帶咗我返佢公司，因為佢要做嘢，所以就困咗我喺佢公司嘅遊戲房入面，我好驚但又開唔到門

我細個好鍾意飲益力多，但因為益力多好貴，我要到特別節日先可以飲

有一年我生日我想要個公仔，但我爸媽負擔唔起，所以佢哋送咗一個加菲貓嘅相架仔俾我

我讀幼稚園時要背1-100，我背唔到，我爸媽推咗我出門口

到我小學嘅時候，同班同學生日會喺M記搞生日會，我就一直以為我係因為我生日喺暑假冇人會嚟，所以冇得搞生日會

我小學成績好好，中學入到一間所謂 Band 1嘅英文中學，但中一開始成績一落千丈。我一直覺得自己係小時了了，到人大咗，先知當年我小學成績好係因為我爸媽買好多練習俾我做，而我小學考試測驗出嘅題目係喺果啲練習直抄出嚟，我記得個答案所以分高，而唔係我真係識得啲題目

好困難地過咗個中學，碌咗入大學。當年入大學嘅時候，我中學嘅econ老師同我跟另一個學生講：「如果你哋借唔到loan，可以用兩個方法拎到full grant and loan，一、去律師樓，做張衰仔紙；二、搵一個同你情況差唔多嘅同學結婚」

我返屋企同我爸媽講，俾我爸鬧到升天。身邊有好多屋企人現金出糧但人工高嘅都可以借到grant，亦見到有人真係用以上方法拎到grant。到最後，我借足 non mean，還到今日都未還完

入到大學，我留意到我身邊嘅同學起碼有80%以上都係嚟自小康或以上嘅家庭。嗰一刻我先體會到，原來屋企提供到嘅資源真係可以左右到入大學嘅機會。每一年，電視都會播一啲比我屋企窮百倍嘅人，住劏房但會考考到10A或者5A入MBBS（內外全科醫學士）嘅狀元，但現實係更多入到MBBS嘅人都係來自於好似麥明詩嗰類有能力提供到足夠資源嘅家庭
.
到大學畢業，眼見其他同學可以慢慢揀自己想做嘅嘢，又或者走去working holiday，而我因為要還non mean，加上我係雷曼嗰年畢業，基本上我係有人請就要做。我第一份工月薪係$8000，每三個月要還non mean $6000，仲要俾家用屋企（老實講都唔係多）。喺頭一年，我差唔多每次要還non mean嘅嗰個月，我都要問朋友借錢先可以過到。直到而家，我每一次諗返，我都會怨點解我爸媽唔肯幫我做張衰仔紙

直到出咗嚟做嘢超過十年，最辛苦嘅日子我挨過咗，好好彩我喺工作上遇到一啲對我好好嘅老細，到今日我可以搵到一個好唔錯嘅人工。但其實我自己係好唔鍾意我做緊嘅嘢，只係因為性質上係類似要孭數（唔係跑傭金，都係咬老底），所以人工相對一啲 back office或者admin較高

當有朋友同我講：「你就好啦，人工咁高」

我總會講：「有頭髮邊個想做癩痢，有錢邊個想做sales？」

做到而家喺公司算係中間嘅管理層，我老細年紀比我細，佢諗嘅嘢、睇嘅嘢都比我闊同遠，我自己知道，我已經到咗我能力範圍以內可以達到嘅career ceiling。因為再上到我老細嘅level，係我到唔到，原因唔係工作能力嘅問題，而係要做到總經理，要嘅除咗係「識做」，仲要有「mind set」，而呢種「mind set」唔係嚟自工作嘅經驗，係嚟自由細到大成長嘅見識，同諗嘢嘅方式。工作經驗可以儲，但諗嘢嘅方式係由細培養，受原生家庭同成長嘅環境嘅影響，係儲唔到返嚟

我同我爸媽關係一直都好好，加上我近幾年開始搵到啲錢，所以而家我都盡我能力去供養佢哋。有一次我好唔開心，我有同我媽呻：「你哋無錢又要生，其實係製造咗一個悲劇出嚟」我知道佢嗰一刻好傷心，但我嗰陣情緒到都顧唔到咁多，而家我都好後悔當時咁樣同佢講嘢，雖然呢個係一個事實

我而家有自己屋企有個仔，我盡量想做到嘅係等佢唔好行我條舊路，我想佢思想正面，可以勇敢表達自己嘅情緒。我哋會用正向教育鼓勵佢同引導佢，我想培養佢諗嘢嘅方式，因為呢樣嘢會跟佢一世，影響佢以後做嘅決定，所以我哋送佢去國際學校，唔好好似我以前咁被填鴨

我唔想佢畢業出嚟就要孭住條數，我想佢可以做自己鍾意嘅嘢，我哋幫佢儲教育基金；我唔想佢有負擔，要顧埋我同我老公退休後嘅生活而影響到佢追求自己鍾意嘅生活，我哋而家自己儲錢買保險；我想俾佢多一條後路（詳情唔講太多），我哋送佢去學法文；為培養佢有一技之長，我哋俾佢樣樣都試吓、學吓、睇吓，當知道自己到底興趣係乜再鑽研落去；我想佢有保護自己嘅能力，我安排佢去學柔道

以上講嘅所有所有嘢，都牽涉到錢同錢、錢、錢、錢。而家社會個個都講「贏在起跑線」，而呢條線，係父母俾嘅。到底我個仔能唔能夠achieve得到，最後都係靠佢自己，但父母已經幫佢將個成功率推高過其他人

我想講嘅係，有好多人仲覺得「平有平養，貴有貴養」，其實呢一個諗法係有錢人bullshit緊一啲窮嘅人。因為有錢人需要有一班咁嘅人去幫佢哋做嘢，呢個係一個資本社會，冇可能所有人都喺食物鏈頂層，一定要有人喺下面做嘢。而有呢個平有平養，貴有貴養諗法嘅人，就係幫呢個資本社會提供咗低層嘅勞動力

資本社會會不停俾希望你——哦，香港今年有一個狀元考到DSE 10個5**，佢係一家5口住喺200呎唔夠嘅劏房，連做功課嘅位置都冇，但佢今年考到10個5**入咗MBBS或者LLB（法律學士）等等神科，blablabla。作為一個食物鏈最低層，個base咁大，有一個人今年做到咗啦，佢入到神科預見可以脫窮啦，有人會睇我透個機率係幾多咩？對比其他拎10個5**，IB 45分滿分嘅人，佢哋全部由中產以上家庭出嚟，個機率相對又係幾多？

唔好相信平有平養，貴有貴養呢個諗法，冇錢生仔，你只會製造一個悲劇；生兩個，就係製造兩個悲劇

可能你會講：「唓，你咪又係草根出生，你而家咪幾好」

我可以好肯定咁講，我除咗自己努力之外，好彩加際遇都幫咗我唔少。如果我唔肯定我可以為我個仔提供到一定嘅起跑線（以上講嘅加埋我老公提供嘅一本外國護照），我亦唔會生。而我哋亦唔會生第二個，因為我唔肯定我可唔可以為第二個仔或女提供到我俾我而家大嗰個同一樣嘅生活質素

講到最後，如果我有得揀，我情願我從來冇出世喺呢個世上

讀者投稿@唔係為自己而活嘅小草根