#ParentLicenses1798

最近睇到單台灣新聞，有個小朋友患有妥瑞氏症，會不自主地發出「啾啾」聲，然而其母係都要帶小朋友入戲院睇Top Gun，跟住當然就係俾其他戲院嘅人話做乜咁嘈

其母起身帶個仔走，邊行邊話自己個仔係有病：「至少我們試過了，社會就是這麼殘酷！」 再叫個仔一路行一路同啲人講：「其實我很好的」

大多數人嘅評論都係「個阿媽根本就情緒勒索緊其他人，因為其他觀眾俾錢入場，冇必要忍受片刻嘅安寧俾你個仔打斷」

這報導令我諗起之前有老師投稿訴說某小朋友有自閉症講粗口，留言風向都較為一面倒，但其實老師都係被大家情緒勒索緊——而香港人都好鍾意咁樣情緒勒索他人

《延伸閱讀：#ParentLicenses1759 https://parentlicenses.hk/?p=2096》
《延伸閱讀：#ParentLicenses1771 https://parentlicenses.hk/?p=2271》
《延伸閱讀：#ParentLicenses1783 https://parentlicenses.hk/?p=2337》

我啱啱入讀大學就開始幫小朋友私人補習數學，同課外活動嘅老師一樣，我哋專長喺自己所教嘅嘢，例如畫畫班專長係畫畫；我同小朋友補數，我專長就係數學；至於識唔識同特殊兒童相處，呢層只係靠我哋嘅反應。除非你特別去學習特殊兒童教育，否則我相信所有老師都係靠個人經驗去應變

我細個除咗數學，其他科全部都肥佬，我冇咩印象自己喺學校表現係點，但大個聽返屋企人講，就話有老師擔心過我有咩學習障礙之類。雖然你見我寫字好似有文有路，都係多得手機讀默，否則我到而家都未必打到成段文字

屋企人為咗得個知字，曾經有帶過我去睇醫生，當時有個初步診斷指我係有啲特殊需要。但當時我父母都覺得，就算真係確定咗又如何？於是就冇再睇醫生去跟進或再做進一步診斷，亦冇與我學校，甚或與我講過，而係直至我好大個先同返我講

當時父母對我講嘅原因係，首先唔想我細個孭住呢個標籤；第二佢哋唔想學校老師或同學因為我嘅情況而成日都要遷就我，佢哋覺得咁樣對學校同同學都唔公平；最後，亦係佢哋最唔太擔心嘅就係，同學知道我有特殊需要會取笑我。我讀男校，其實除咗肥佬之外，我同其他同學關係唔差，不過有時細路仔把口係衰

就係咁，喺只有我父母兩個人知情嘅情況下，我都以普通學生讀完咗我嘅中、小學生涯，老師都係當我一般學生咁教。直至我讀完中學要入大學，佢哋先將呢件往事話我知，時隔太耐到佢哋都唔記得咗當初醫生話我係咩問題

我記得當時我唔開心咗一排，反問：「點解你哋唔講？可能啲老師唔會成日鬧我肥佬，會包容我多啲呢」

我媽就係講咗呢句嘢：「我哋唔應該用呢個『特殊需要』去情緒勒索其他人，老師花多啲時間俾你，係上堂時間定放學後？上堂時間你就會佔咗其他同學嘅學習時間，放學後你就會佔咗老師嘅私人時間，佢哋全部都冇義務要花多啲心機、時間俾你」

我父母係好唔鍾意麻煩人，因為佢哋父母都教佢哋唔好麻煩人，要靠自己，反之人哋麻煩你就要努力去幫，但唔好諗住人哋要報答你……嗰種人。當時我覺得我父母唔識嘢，有乜理由個仔有特殊需要都唔搵人幫。但天意弄人，到我開始幫人補習，我先明咩叫「人哋冇義務」

我第一個學生，數學麻麻但英文好叻，補咗一個月都算順利。有次佢突然拎本成個拳頭咁厚嘅英文書出嚟問我識唔識某字，而佢只係小學生，我好天真以為佢真係問我，咁我又真係唔識，咪話幫佢查字典。正當我查緊之際，佢已經講緊個字點樣解

我如夢初醒，原來佢係想考我。之後學生仲同佢媽媽報寸話我唔識個英文字，同日個媽媽就以我唔識英文就炒咗我。當時即使我努力解釋：「英文真係唔係我專長」

佢媽媽都係覺得我唔適合再教佢個女數學：「阿sir，其實如果阿女已經有個感覺你英文唔夠佢叻，就算你真係教到佢數學，佢都未必會再聽你講」

當時我除咗嬲對母女，仲好嬲我父母，若果唔係佢哋諱疾忌醫，令我細個有得到過特殊照顧，可能我會識得個字，而家就唔會俾人炒

後尾我同（大學）同學呻呢件事，佢哋問我係咩字，我放出嚟，點知都冇人識，個個都話：「而家啲細路唔知學乜，讀埋啲咁深嘅字」

然而我諗到嘅反而係「如果我唔係知咗自己曾經可能有特殊需要，或許嬲我父母嘅情緒、覺得自己曾經有不足等等呢啲諗法根本唔會出現」

後來我返到屋企同我父母講返呢件事，當時我想同佢哋講要忘記有個呢件往事，不過可能我講得唔清唔楚，我爸同我講咗第二啲嘢：「傻仔，小朋友係鍾意認叻㗎啦。你細個讀書唔叻，但其他嘢你好識認叻，你又真係俾人見到你唔識英文呀嘛，人哋冇義務俾多次機會你。請你去教，唔係請你去學，下次醒啲啦」

話時話，個英文字係「predilection」，意思係特殊喜好。以後我識啦，同埋之後「醒啲」，學生問數學以外嘅嘢一律唔答

圖片來源@Elephant Nature Park
讀者投稿@補習哥哥