#ParentLicenses1796

我因為啱啱買咗新屋，搬咗去離原本仔仔就讀學校比較遠嘅區域，所以就幫仔仔轉咗新學校，仔仔正就讀小二

我哋唔係富有家庭，但唔係話住劏房，亦唔合資格拎政府任何資助。同大多數父母一樣，我哋好慳，原因係想慳返嚟嘅資源俾個仔有多啲機會見識多啲野

仔仔嘅校服同書包都係朋友贈送，係因為我朋友好錫個仔，每三、四個月就買新書包俾佢，而朋友嘅仔又大得好快，好多時有啲校服未著過就已經唔啱著，所以當朋友問我哋要唔要時都話係好新淨

我哋同仔仔講，慳返嘅錢可以用嚟買書或者玩具俾佢時（佢中意睇書多過玩具），仔仔係好開心咁接受

然而，班上有個男仔係「炫富」細路，成日話用既嘢係咩咩名牌，炫耀自己父母各自月入幾十萬，餐餐食好嘢云云

其實當小朋友咁樣吹噓自己，無非都係父母灌輸，不過人哋點教仔我唔理啦，唯認為唔可以影響到他人，我相信呢個係對人應有最基本嘅尊重同禮貌

件事係仔仔同返我講嘅。我仔仔係一個好靜嘅小朋友，加上轉咗新校，佢有少少唔習慣，平時放小息佢會選擇自己靜靜地睇由圖書館借返嚟嘅書。我哋唔係唔買書俾佢，只係小朋友三分鐘熱度，買咗但唔睇做擺設又好嘥位，所以我哋每個禮拜都會帶佢去圖書館，真係好鍾意本書我哋先會買（其實佢有幾個書櫃，未計教科書，都有差唔多二三百本書）

男仔：「我咁大個仔都未去過圖書館借書，全部書都係媽媽買，唔使問人借」

男仔續道:「你個書包好靚呀」

我仔：「係姨姨俾嘅」

男仔：「我個書包係名牌，幾千蚊；對鞋都係名牌，又（幾多錢）㗎」

我仔冇理佢繼續睇書，個男仔就大大聲：「xxx屋企係窮人，要去圖書館借書同用人哋用過嘅嘢」跟住有啲同學喺度笑

仔仔返到屋企悶悶不樂，我問咗好耐佢先講：「媽咪，我哋係咪好窮？」

我好詳細咁解釋俾佢聽點解我哋用人哋啲野，唔係因為我哋無錢買，而係覺得慳返嘅錢可以用喺其他令你更開心嘅地方（例如學新嘢、書、玩具等等）。我同佢講：「唔使理人點講，自己知道唔係就得」順便教埋佢同理心，知道咁樣會令人唔好受，自己更加唔可以咁做

第二日，因為班長同我仔算叫比較友好，大家又住附近，我就問係咪發生過呢件事，佢班班長話有。我即時打去同佢班主任反映件事，並且嘗試確認個男同學係咪特殊兒童。班主任話佢冇學習障礙，而且會同個男同學嘅家長溝通。我清楚表示唔想要有同類事件發生，因為個男同學行為已經算係欺凌。班主任好好都話會多啲留意，又話嗰個男同學喺學校都有試過蝦其他同學，有被訓導主任訓過話，而且佢父母都知

人哋父母點教我真係阻止唔到，唯有改變自己個仔嘅心態，但係點解咁細嘅小朋友會識咁講，相信佢一定喺耳濡目染下先會咁講嘢。但如果自己個細路曾被訓導訓話過，之前又有其他蝦同學嘅前科，作為家長係咪應該要管教一下？

我真係唔明佢父母點諗，你話係特別兒童就話啫

讀者投稿@你咁窮要用人地俾既野