#ParentLicenses1795

因為父母離婚，所以自幼稚園開始同阿媽相依為命，阿爸以前一個月探我一次，後來幾年見一次，所以同佢感情唔深

略略講下點解佢哋離婚。阿爸係圍村人，有丁權，阿爺阿嫲得佢一粒仔，所以希望有孫仔抱。但阿媽生我之前流產過兩次，最後得我一粒女。阿爺阿嫲直程叫阿爸放棄我媽，然後佢周圍滾。最後佢哋離婚，我跟阿媽

去到好後期，阿爸再婚，又係啲垃圾中港家庭，識咗個大陸女人，生咗一仔一女

阿爸當時仲有幾年退休，阿爺釘咗、阿嫲老人痴呆兼坐輪椅，而個大陸女人咩都唔理，淨係識得搶阿爸錢。佢哋曾經請過幾次工人，唔係偷錢、偷懶，就係借大耳窿，最終佢哋湊唔掂，要搵我求救

我死都唔肯湊，我知佢哋屋企電視一年換幾部，啲細路成日搵玩具掟爛個屏幕，總之好曳，我都唔識形容。但阿爸幾句得落嚟話：「佢哋係你細佬細妹嚟㗎，同你有一半血緣㗎」

最後我冇理佢，自此之後冇見幾年

後來有日佢聯絡返我，話見到我同我個仔喺街，就問：「可唔可以探下我咃？」

我再一次冇理佢，因為我唔想個仔知道有個咁樣嘅阿公，亦都唔想俾佢接觸佢哋一家。一來個大陸女人唔知會做啲咩（曾經個女人無啦啦走上我媽屋企踢門），二來我都唔知個仔點稱呼嗰兩件細路

臨老先生件細路出嚟，仲要湊唔掂累及下一代，有時見到啲新聞話咩咩80歲老豆同10零歲阿仔打交乜乜乜，見到都眼冤

單單一篇文就已經揭示幾樣問題，都唔係生仔要考牌咁簡單，係睇到重男輕女嘅禍害幾咁深

讀者投稿@老豆個女