#ParentLicenses1790

話說我做串燒生意嘅，我諗大部分人都食過串燒，認同串燒係一串串啩，但竟然真係有家長唔知

今日嚟咗枱好巴閉嘅客人，帶住兩個好細嘅小朋友，小朋友身材比較矮，我估4, 5歲左右

女人一入嚟我間舖就問：「有冇咩係啱小朋友食？」

其實每當有客人咁問，我都係咁答：「全部都熟嘅，同埋可以整唔辣嘅」

因為我真係唔知咩係你小朋友食得，例如有啲家長逢係內臟唔俾小朋友食，有啲家長又俾

其實menu有晒咁多種食材，你覺得啱小朋友食咪叫，唔啱咪唔好叫，我唔可以幫你決定㗎嘛

好啦，咁佢哋落完order，啲串燒送上枱時，個女人話：「嘩，咩串燒真係成串上㗎咩？你見唔到我有小朋友？唔識燒完整出嚟俾我哋？」

我同事自然反應咁答：「串燒唔成串上，你想點上？」

個女人就投訴佢冇禮貌，又話：「你間黑店嚟㗎？」

我心諗：「你係咪唔知黑店點解？」

我之後叫走咗個同事，同個女人講：「我叫廚房整出嚟俾你啦，不過下次叫串燒前要講聲走竹簽，因為唔係個個家長都唔俾小朋友用竹簽食，所以我哋唔會擅自幫佢哋決定走竹簽㗎」

女人不服：「佢咁細梗係唔用得啦，你哋可以問咗先上㗎嘛，咁嘅服務態度仲想我嚟下次？」

其實你生仔唔係大晒㗎，唔係個個都係你工人，要主動服侍你個仔。如果想人哋走竹簽應該主動講，因為我哋係要做多重功夫幫你一舊一舊咁整返出嚟。同埋，如果真係咁驚個仔整親，又唔自己做多一步，你係咪應該考慮食其他嘢？

仲有呀，我哋冇收你服務費喎

圖片來源@行運一條龍
讀者投稿@黑人問號