#ParentLicenses1787

話說最近某套講恐龍嘅電影上畫，身為fans一定係買定最靚嘅位入場睇

據我所知，呢套戲唔係兒童片，分級係IIA，但都有唔少家長帶仔女入去觀賞

開場前，其實已經聽到後面有啲人高談闊論，包括一個講普通話，年齡約3, 4歲嘅小朋友，不過，唔關佢講咩語言事，只係聽到佢個音量就知不妙，應該係啲唔係好識控制音浪嘅年紀

男朋友仲同我講：「個小朋友應該會嘈足全程」

但我見其實未開場，個小朋友又有老豆陪住應該問題唔大，我仲安慰佢：「唔會啦，開咗場應該會安靜」

事實證明係我太天真，個小朋友真係開始不停用與角色對話一樣咁大聲嘅音量問佢老豆問題：「這個是什麼恐龍」「他要死了嗎？」「這是狐狸」

我一開始心諗佢老豆應該會叫佢安靜，但個老豆好似絲毫唔打算阻止佢出聲，仲踴躍咁回應小朋友

途中我忍唔住回頭「殊」咗佢哋兩次，因為個音量大到係講緊有打鬥場面都聽到佢哋講嘢，但佢哋都係冇回應過，亦都冇理會我

去到套戲嘅中段，佢哋又大聲講嘢。我忍唔住擰轉頭講咗句：「可以請你們安靜嗎？謝謝」

個老豆竟然話：「細路仔嚟啫，忍耐下啦」

估唔到我都會聽到呢句經典說話「他只是個孩子」

嗰下真係好嬲，我都知佢係小朋友，未必控制到自己，但大人唔係應該要教導佢入戲院要安靜咩？我俾錢入場係睇戲，唔係聽你教佢恐龍知識囉。如果想大聲講嘢，你可以包場，不過當下我都唔想影響到其他人，就無再同佢嘈

如果佢再大聲講嘢，我打算就出去搵職員同佢溝通算，但似乎呢個年紀嘅小朋友應該都知醜，少咗大聲講嘢。而最後散場時，我哋都決定快啲走人算，唔想再同個老豆有正面衝突

只可以講，睇戲唔洗考牌，生仔要

圖片來源@低谷喜劇
讀者投稿@草食龍