#ParentLicenses1776

我份工係教小朋友，唔係坐定定嗰啲堂，會喐身喐勢，有指定動作學，確實係咩？我唔講太清楚了

有次有兩個好細嘅兄弟嚟上堂，大嘅7歲，細嘅5歲，阿哥好精靈自動自覺，弟弟好怕醜痴住阿媽

因為家長不能陪同上堂，需要離開，弟弟遂攬住阿媽喊爆，反觀阿哥自動自覺出嚟排隊

阿媽狂氹弟弟，喺門口擾攘咗好耐，然而大家上堂分分鐘都係學費，所以就由得佢哋，先同其他同學開始上堂先

搞咗20分鐘後，弟弟終於肯加入，點知阿媽質問我：「點解唔等埋我細仔先開始？」

我：「其實我哋夠鐘就開始，建議你下次唔好咁掹先氹佢」

及後，阿媽就藐晒咀咁走咗

上堂期間阿哥表現好好，一兩次就記得晒啲動作，弟弟就企喺度唔肯郁，一係就挨埋牆。我叫阿哥帶弟弟一齊行動，弟弟係都唔肯，都冇辦法

之後落堂俾大家功課就係返去練習，我講明：「如果冇練，下一堂要落堂後留喺度練返先准走」

如是者，第一堂就咁完結咗

個老竇問我：「佢哋學成點？」

我就如實同佢講返個情況，個老竇竟然叫我教佢，等佢可以返去教兩個仔

我心諗：「你冇報名上堂喎大佬」

最後我都照教咗佢一啲好基本嘅動作。個老竇就一聲唔該後，帶住兩個仔同老婆走咗。目前都感覺老竇正常

到第二堂，嗰啲爆喊又開始。今次我唔等，阿媽冇出聲，而上堂情況依舊。

落堂前，我問：「返去有冇練習？」

有幾個好誠實話冇，包括阿哥，我問佢弟弟有冇，佢話都冇。咁就其他人落堂走咗，幾個留低練完先准走，我就做埋啲文書嘢

其實好多同學都記得啲動作，只係偷懶，所以落堂留低練習，基本上超快完成走人。未幾，成個班房就得返佢兩兄弟同父母

阿哥因為新學，慢慢嚟，我一路做，一路瞄，基本上都ok；弟弟就去咗lur 阿媽

於是我叫弟弟出嚟跟住阿哥做，但佢企阿哥旁邊都係齋企

我問弟弟：「記唔記得任何動作？」

弟弟唔睬我

阿媽嚟料，大聲喝我：「好心你教下佢啦！」

我費事理佢，到我整晒文書嘢，同時阿哥嚟同我講練完，我叫佢坐低休息等弟弟，佢就好乖去攬住個背囊坐定定等

我叫弟弟過嚟，佢又走去lur 阿媽；我再叫佢過嚟，阿媽就同弟弟講：「係咪老師唔好呀？係咪對你唔好？淨係教阿哥唔教你呀？老師係咪偏心呀？」

弟弟即刻望下阿哥，就勁委屈咁望咗媽媽一眼，跟住垂頭喪氣。我真係眼都突埋

我火都嚟，但好理性問阿媽：「你有冇注意到大仔坐喺旁邊？佢聽到你頭先嘅說話」

阿媽冇答我，淨係拖住細仔起身走，一路行，一路眼超超?住我

當佢起身時，大仔啱啱拎水壺出嚟飲水，佢非旦完全唔理大仔未準備好，仲嚟手將細仔個袋扔俾大仔就行咗出去

個老豆就咁跟住個老婆走咗，而阿哥就即刻執嘢，孭返自己袋，抽住弟弟個袋跑住追出去

行到?口，聽到阿媽同弟弟講：「媽咪俾開心糖你食，唔好理哥哥同老師」

然後沒有然後，佢哋就冇再嚟了

雖然兩兄弟好似樣，但其實我好懷疑阿哥唔係親生

讀者投稿@替阿哥慘的老師