#ParentLicenses1756

我有個21個月大嘅仔

我哋兩公婆都要返工，由太太放完產假開始，外父外母就每喺工作日朝早搭車（都係東九龍）過嚟幫我哋湊仔，到我哋放工先走。我唔否認佢哋肯咁做，幫我哋慳唔少，喺好多父母心目中，我哋「執到啦」。但佢哋唔肯俾我哋裝cam，ok，我信你哋無論如何都唔會害你哋個孫，咁唔裝啦

喺阿仔幾個月大嘅時候，佢哋趁我哋返咗工，帶太太嘅阿嫲（太婆婆）上嚟，俾我哋發現咗。我哋同外母講唔可以咁做，佢就發爛話唔嚟湊。然而，我屋企嗰邊冇人幫到我，佢話唔嚟就唔嚟，咁我唯有請假自己湊住先囉。做好心理準備，一邊燃燒自己嘅大假，一邊搵辦法、搵人湊。最後自己湊咗一日，外母下咗啖氣，隔日又過返嚟湊

有時我哋都懷疑係咪有人喺我哋唔知情嘅時候上過嚟。例如有一次，屋企有隻客人用嘅玻璃杯爛咗，但佢哋兩老係會自備水樽/保溫壺用，平時唔會用我哋啲杯嘅。咁隻客人用嘅杯，照計放喺櫃入面好地地就唔會爛啦，即係拎過出嚟啦，但點解要拎隻玻璃杯出嚟呢？

上星期四夜晚，外母通知太婆婆星期五會嚟探B。係，係「通知」，唔俾我哋say no。咁急我攞唔到假，唯有射波，好衰唔衰，個醫生勁慢，我遲咗返去

返到屋企，外父餵緊粥，太婆婆着住我對拖鞋，坐咗喺度，除緊口罩。其實我屋企係有準備客人用拖鞋嘅，但外父可能唔知啦，咁呢個場面我又唔好意思開口換返自己對拖鞋；就算換返，未消毒過我都唔會着

太婆婆除完口罩，外父拎咗包純水濕紙巾俾佢抹手，仲要話「消毒」。我即刻糾正話嗰包唔係消毒濕紙巾，帶太婆婆去洗手。因為我去完診所返嚟，都要沖咗涼先敢掂阿仔，沖完都冇拖鞋着，要赤腳通屋行

阿仔食完粥落地玩，太婆婆扭開保溫壺想飲水，阿仔八掛又想走埋去飲，我就叫住阿仔：「No~no，你自己都有水杯㗎，飲你自己嗰杯，遲啲返學學都只可以飲自己嗰杯，唔可以飲同學仔杯水㗎！」

佢哋臨走時，我趁外父去換衫（外父外母都知出面多菌，上嚟會換衫，但太婆婆唔明，以為出街前換咗乾淨衫就好衛生啦，咁我哋都唔想麻煩佢，由佢上嚟唔換衫），我同太婆婆講：「下次上嚟直接同XX（我太太）講，同佢約時間，搵日我哋都放假嘅日子啦，唔好隔咗媽咪（我外母）嚟約喇！好似今日咁，佢通知唔切我哋，我今日要詐病請假先返到嚟」

太婆婆：「唔驚，你外父外母喺度嘛，我又識自己嚟！」

我：「外父唔知我哋啲嘢放喺邊嘛，嗱，我哋有乾淨拖鞋都冇攞俾你，搞到要你着我對拖鞋」

太婆婆：「哎呀，唔好意思喎！」

當晚太婆婆whatsApp我太太：「你爸爸喺度，我嚟探BB有乜問題？」

我叫太太覆：「冇問題，你想見BB，我哋都想見你嘛，等我哋喺屋嘅時候嚟，咪可以順便俾我哋見你囉」

太太同外母講飲水嗰單嘢，外父話：「玩下啫，冇真係飲」

我心諗：如果我唔叫住阿仔，外父你會制止？太婆婆會縮？唔會囉！太婆婆驗咗冇肺炎啫，口水都可以傳播好多病㗎！阿仔有咩事，「玩下啫」就會好返？

係，食得鹹魚抵得渴，有本事咪請工人湊囉。我只係想請教咁多位爸爸媽媽，外父外母上嚟幫我哋湊B，係咪就可以喺屋主唔在場嘅情況下，招呼其他人上我哋屋企？係咪我鑽咗牛角尖？

讀者投稿@女婿