#ParentLicenses1750

我係一個做完大手術，要休養，唔方便自己一個住嘅中女，出院後直接返咗娘家

其實都唔直接，只係母親大人勸我返去娘家休養。我曾經喺手術前都糾結咗好耐先決定到返娘家住，但回娘家呢段時間，再一次發現娘親同父親生仔前唔記得考牌

事件一

娘親太忙煮唔到飯，大廈同時納入強檢名單

由於用app叫外賣都要落樓拎，於是父親放工買飯盒返嚟。每一盒都係有蛋，有牛，或者有海鮮，即係——我全部都唔食得，因為開刀嘅傷口連痂都未結晒

我有禮貌地提咗佢要留意唔好買啲咩嘢食，但買到第三次都係我唔可以食嘅嘢嚟，啲飯一係有牛肉汁或者蛋汁嗰啲

我唯有每次都要揀到一個飯盒冇乜汁，搬開有汁嘅飯，再搬開我唔食得嘅嘢落兩老個飯盒度

事件二

有一日中午娘親喺屋企整佢開工啲嘢太忙，佢使咗我落街買午餐

雖然前後都只係二十分鐘，但我真係太虛弱，拎住午餐返到樓下都有啲暈。我有反映返我體力嘅問題，但第二日中午，佢都係使我落街買埋佢嘅午飯

諗返起用app叫餐送到樓下，我再落去拎可能會好啲，但係自己心裡面都好想落去行個圈抖啖氣，所以係自己想出街唔啱

事件三

再關大廈強檢事，我其實唔想落去，但俾完手術同住院費，已經冇錢被正苦罰多五千，打去問又話有機會收信嗰啲

嗰日都仲驚緊自己一個會暈，問佢哋會唔會可以陪我去（兩老中過，有通報，所以呢段時間唔使再檢）。然而，屋企冇人理過我嘅問題之後，我自己落樓去撩鼻再順手買少少乾糧

喺體育館裡面已經收咗娘親三次電話，喺呢段期間不斷打嚟提我幫手買啲咩咩咩嗰啲。我有回應我剩係夠力買到咩咩咩嗰啲，重嘅我唔夠力，拎唔到

最後佢喺我返到去之前，自己落咗街買佢要買嘅嘢

經過反省後，我落街唔會再聽娘親電話，大廈再強檢嘅，我會寧願被罰錢

事件四

手術前醫生護士問咗我一大堆問題，我剩係講到「好細個嘅時候就知呢堆藥物敏感，我剩係有印象自己好幾次被送去急症室跟住醫院有紀錄」

呢段休養時間太無聊，問返兩老當年做咩事

兩老講到嘅一係「剩係記得你知道呢隻藥你敏感，然後你自己睇到個藥盒同我講你唔食得，我有迫你食咗，跟住你成個人係咁流眼水同塊臉腫晒囉」，一係「有一次喺街食完飯返嚟唔知咩事喘氣，我哋俾咗粒藥你食，記得你有提我哋呢隻藥你敏感，你開頭唔肯食嘅，迫你食完冇耐你更加抖唔到氣，觀察咗一陣先同你去咗急症室囉」

喺講嘅過程中，佢哋覺得我細個嗰時反抗唔肯食藥係我唔啱

我都忍唔住問：「點解明知我藥物敏感都要迫我食？」

佢哋有答返我：「藥嚟㗎嘛，點知啫？」

敏感嘅嘢我娘親同父親真係識條鐵。當年抖唔到氣嗰次，有可能令到仲讀緊幼稚園嘅細佬有心理陰影，等我遲啲精神啲再訪問吓佢

讀者投稿@因為休養回娘家嘅中女