#ParentLicenses1733

事源係成日都見到有人只用旁觀者視覺，睇到人哋啲父母同仔女相處幾分鐘就出po公審人哋，話人哋衰老豆/母，但其實根本有好多旁觀者都唔清楚前因後果、來龍去脈就未審先判

就以「電子奶嘴」為例，個個街外人一見到有父母俾電話仔女收聲，佢哋就會即刻正義人魔上身，指責父母成日靠電子奶嘴，小朋友又會眼盲，又呢樣嗰樣，但可能人哋個小朋友只可以出街先可以享受電子產品呢？

再者，若果我唔俾電話小朋友睇，又有幾多個只得幾歲嘅細路係可以坐定定，雙手放大脾，乖乖坐足全程或者食到成餐飯？如果一陣嘈親你，你係咪接受同體諒先？我肯定有仔女嘅父母就會明！

我自己有時都會分享自己親身經歷喺自己私人社交平台，但注意係「親身」。如果事情係的確影響到自己，可以令我先反思「啱嘅就學，唔啱嘅就唔好學」，再先會分享或者下評論。所以真係唔好再「旁觀者審」，你只不過係一個路過嘅陌生人，唔好單單睇少少嘢就評擊人

我成日都話「做父母壓力好大」，但「喺香港做父母壓力仲大」，所以放過我哋啦！唔好再隨便影張相就公審我哋！除非你真係了解晒事件嘅來龍去脈，又或者係傷害小朋友嘅事

圖片來源@國產凌凌漆
讀者投稿@我係垃圾老母