#ParentLicenses1727

話說屋企張床褥要換，老公打咗去將軍澳中心Sealy問完有冇我哋上網睇到想試嘅款，職員話有，咁我哋就搭車出發去睇

一去到，未入門口，都聽到入面已經好嘈。入到去見到其中一張king size床上瞓咗3個細路（3個都係男仔，估計8-10歲），喺張床度又攬又打交，又碌嚟碌去，又un又盛，差在未企喺上面跳，連張床褥保護膠墊都俾佢哋玩到移晒位?

佢哋係就係有除鞋，但係對襪係黑鼆鼆㗎！佢哋玩完一張就轉戰另一張，愈玩就愈興奮

至於幾個細路嘅呀爸呀媽？佢哋好悠然自得咁試緊床褥，完全冇出聲控制下幾個仔??‍♀️

當時舖頭入面有4至5組客人，2至4人為一組，但係只得一個職員，睇得出佢都好無奈，我哋就更加無奈，特登去到但試唔到。最後我哋只係試咗其中一張想試嘅就走人，因為真係太嘈，太影響到心情??

可能有人會話小朋友好難控制，但係最低限度都要試下出聲？或者扮下出聲？或者即刻離開間舖頭？唔好影響到人先啩？???

讀者投稿@E