#ParentLicenses1720

是這樣的，去樂園本來係一件開心事，但遇上怪獸家長真係想鬧爆佢

樂園而家有條白線係希望排隊嘅人有返一定距離，唔好企得密麻麻

我同朋友兩個人去咗玩兵團跳降傘，排後面有一家四口（媽媽，姐姐，男小朋友同女小朋友）。男小朋友企唔定，爬欄杆，我都理解，只要唔好整到人整到自己就好；女小朋友就一直用手指仔搲男小朋友屁股，姐姐見到即刻叫停

到準備去坐跳降傘時，由於現時樂園只可以坐兩人一邊，三人家庭都要分開坐，所以需要等候上一輪嘅人玩完離開，我哋要企喺度等佢哋離開咗，再經由職員開閘先可以入

一切看似都無咩問題，突然間有另一家三口嘅家庭——一個失控嘅老豆老母唔理在場排隊嘅人，等候職員一開閘嘅瞬間，佢哋好似冠軍馬咁喺側面攝出嚟去搶位

我同朋友見狀已經問：「係咪唔識排隊？」

到我哋見到有位，當時兩邊都無人嘅，正常就坐落去。怎料到一坐底後，本來正排我哋後方嘅一家四口中嘅老母就突然跳出嚟話：「你哋做咩坐咗我個仔嘅位？」

當時因為傘與傘中間有個箱俾人放嘢，所以遮住咗視線

我哋當時表情黑人問號咁嘅樣：「座位無人，點解唔可以坐？」

一家四口老母：「（開始激動）你哋做咩搶咗我個仔個位？」

我哋：「當時無人，搶咩嘢？」

一家四口老母：「（大聲地說）妖，我個仔過嚟同我講嘢，你哋就坐落去」

我哋：「呢個位當時無人坐落嚟，你都識講個仔去搵你，寫咗名知你哋留咗位？」

一家四口老母：「（反晒白眼，聲大大咁講，揚手叫職員）我哋一家人要對住坐」

我哋就戴好安全帶坐定定，同時聽到一家四口老母同職員講：「佢哋坐咗我個仔個位，我哋無得對住坐，快啲趕佢哋走」

隨後就有職員過嚟問我哋：「小姐，唔好意思，請問你哋可唔可以坐下一輪，讓座俾佢哋？」

我哋：「唔好意思，唔可以，因為小朋友媽媽無禮貌，我哋唔會讓座」

啫係咁，唔係大聲就等如你可以有位，喺小朋友面前，唔該又有俾返啲禮貌嘅，讓俾你有咩所謂；但無禮貌又嘴藐藐，就一定唔會讓俾你

希望小朋友學足你呢個行為，等你感受一下自己有幾難頂

讀者投稿@迪士尼之旅